Elordada «Aıýlar dostastyǵy» atty erekshe kórme ashyldy
STANA. Mamyrdyń 15-i. QazAqparat /Marlan Jıembaı/ - Búgin elordanyń sol jaǵalaýynda Nurjol jelekjolynda «Aıýlar dostastyǵy» atty erekshe kórmeniń ashylý rásimi ótti.
Ashylý saltanatynda sóz sóılegen Astana qalalyq mádenıet basqarmasynyń bastyǵy Erkebulan Aǵymbaev búgingi shara Germanııanyń Qazaqstandaǵy jyly aıasynda ótip otyrǵandyǵyn aıta kelip, «jalpy álemniń 150 memleketinde kórsetilgen bul kórmege qoıylyp otyrǵan 125 aıýdy Birikken Ulttar Uıymyna múshe memleketterdiń qylqalam sheberleri áshekeılegen. Qazaqstan atynan qoıylǵan baddı aıýyn belgili ári tanymal sýretshi Láılá Maqat bezendirdi. Onyń bezendirgen aıýy 150 memleketti aralap, álem halyqtarynyń nazaryna usynylatyn bolady», dep atap ótti.
Sondaı-aq shara barysynda sóz alǵan Germanııanyń Qazaqstandaǵy elshisi Raıner Oıgen Shlageter bul jerlerdegi aıýlar árbir memlekettik mádenı qundylyǵyn pash etetindigin atap ótip, kórmeniń elorda ákimdiginiń qoldaýymen ótip otyrǵandyǵyn aıtty.
«Astanada bul aıýlar qalanyń sımvolyna aınalǵan Báıterekke qarsy oryn tepti. Olardyń barlyǵy da óz elderiniń elshileri. Aıýlar sonymen qatar halyqtar arasyndaǵy túsinistikke, tózimdilikke, mádenıetter men dinder arasyndaǵy yntymaqtastyqqa shaqyrady», dedi Elshi.
Onyń atap ótýinshe, óner týyndylary Berlınnen bastap álemniń Ystambul, Gonkong, Tokıo, Kaır, Býenos-Aıres syndy qalalarynda kórsetilip, 2002 jyldan bergi ýaqytta 20 mıllıonnan astam adam tamashalaǵan.
«Biz bir-birimizdi jaqynyraq tanyp-bilýimiz kerek. Sonda ǵana biz ózara túsinistik pen senimge qol jetkizip, jarqyn ómir súretin bolamyz», degen urannyń astynda toptasqan bıiktigi 2 metrlik alyp aıýlar kórmesi shilde aıynyń sońyna deıin jalǵasady.
