Elordada Aınur Bermuhambetova «Aı-nur álemi» atty kontsert-spektaklin kórermenge usyndy

NUR-SULTAN. QazAqparat - Kóktemniń alǵashqy kúnderinde Qazaqstannyń eńbek sińirgen qaıratkeri, teatr jáne kıno aktrısasy, dýblıaj sheberi, Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń orta býyn aktrısasy Aınur Bermuhambetovanyń «Aı-nur álemi» atty kontsert-spektaklin kórermenine usyndy, dep habarlaıdy QazAqparat.

Kesh barysynda Aınur Bolatqyzy eki saǵat boıy jandy daýyspen ártúrli janrda nebir kúrdeli ánderdi shyrqady. Shaǵyn monologtar men poezııa oqydy, rólderden úzindiler oryndady. Qazaq ónerine ómirin arnaǵan tarlandardyń ekranda beınelerin shyǵaryp, ánmen taǵzym etti.

«Aı-Nur álemi» dúldúli aktrısany, bulbul ánshini, ǵajap kórkem sóz sheberin, dýblıajdyń maıtalman mamanyn, ulaǵatty ustazdy óner súıer qaýymmen qaýyshtyrdy. Ónerli otbasy Óteýilov Nurken men Aınur óner áleminde bir-birine súıeý bolyp eki ul tárbıelep otyr. Anasynyń keshinde kishi uly Aqarys Áshimhan gıtaramen án salyp kórermender yqylasyna bólendi. Grýppalastar Qazaqstannyń eńbek sińirgen qaıratkerleri – Q.Qystyqbaev, S.Kamıev, A.Imanbaeva, N.Óteýilov, A.Bermuhambetovalar shyrqaǵan «Qyz Jibek» operasynan arııalary men ázilder de qoshemetke ıe boldy. Káýken Kenjetaev, Esim Segizbaev, Amangeldi Sembın, Murat Ábzelbaev syndy uly ustazdardyń talantty shákirtteri elimizdiń túkpir-túkpirinde óner úshin qyzmet etip júr.

Kesh sońynda QR Mádenıet jáne sport mınıstri A.Raıymqulovanyń alǵys haty oqyldy.

«Óner jolynda epostyq keıipkerlerdi de zamandastar beınesin de, ana obrazdaryn da sátti somdap, teatr tarıhyna Bermuhambetova qoltańbasyndaǵy «Qyz-Jibek», «Áıgerim», «Teńge», «Álıman», «Zarıpa» syndy shoqtyǵy bıik keıipkerlerdi syıladyńyz. Ónerińiz ómirlik ustanymyńyzǵa aınalyp, ólsheýsiz eńbegińiz Memleket tarapynan baǵalanyp Qazaqstannyń eńbek sińirgen qaıratkeri ataǵyn ıelendińiz. Elordamyz Nur-Sultan qalasynyń mádenıeti men óneriniń qalyptasýyna súbeli úles qosyp, Q.Qýanyshbaev atyndaǵy Qazaq Memlekettik akademııalyq mýzykalyq drama teatrynyń kórermenin óner nárimen sýsyndatyp kelesiz», – delingen quttyqtaýhatta.

Sol sııaqty keshtiń basty qoldaýshysy Nur-Sultan qalasy Mádenıet basqarmasynyń basshysy N.Sydyqovtyń atynan da arnaıy alǵys hat usynyldy.

«Elordalyq Q.Qýanyshbaev atyndaǵy Qazaq memlekettik akademııalyq mýzykalyq drama teatry sahnasyndaǵy Ǵ.Músirepovtiń «Qyz Jibegindegi» - Jibek, M.Áýezovtyń «Qara qypshaq Qobylandysynda» - Qarlyǵash, «Abaıynda» - Áıgerim, «Aıman – Sholpanda» - Teńge, Q.Baıseıitovpen Q.Shańǵytbaev «Beý qyzdar-aıyndaǵy» - Aısulý,V.Delmardyń «Baıansyz baǵyndaǵy» - Roda, Sh.Aıtmatovtyń «Ana–Jer Anasyndaǵy» - Álıman, «Ǵasyrdan da uzaq kúnindegi» - Zarıpa, Á.Núrpeıisovtiń «Qan men terindegi» - Aqbala, I.Shtraýstyń «Jubaılar jumbaǵyndaǵy» - Rozalında, A.Tsagarelıdiń «Gamardjobasyndaǵy» - Hanýma, J.M.Shevreniń «Іzgilik formýlasynda» - Jann; J.Anýı «Jalyn jutqan Janna d’Arktaǵy» - Janna syndy beınelerińiz halyq júreginen erekshe oryn ala bildi.

Sizdiń shyǵarmashylyǵyńyzǵa tolaǵaı tabystar men úlken jetistikter, tileımiz!», - delingen habarlamada.

Arnaıy quttyqtaýlardan keıin, teatr dırektory – Ónertaný ǵylymdarynyń PhD doktory, Qazaqstannyń eńbek sińirgen qaıratkeri Ashat Maemırov sóz sóıledi.

«Nur-Sultan qalasynyń ákimdigi, Mádenıet basqarmasynyń qoldaýymen búgingi «Aı-Nur álemi» degen qoıylym ótti. Elordamyzda úlken qarashańyraq Qallekı teatrynyń ujymy júz paıyz Sizderdiń aldaryńyzda tirideı, jandy daýysta óner kórsetti. Tabıǵı túrde keremet qoıylym jasady. Bul kesh bizdiń teatrdyń potentsıalyn kórsetetin qoıylym boldy», - dedi Ashat Maemırov.