Elordada áıel urlaǵan kúdikti ustaldy
NUR-SULTAN: QazAqparat – Nur-Sultan qalasynda buryn birge turǵan áıelin urlaǵan kúdikti ustaldy, dep habarlaıdy QazAqparat qalalyq polıtsııa departamentiniń baspasóz qyzmetine silteme jasap.
Polıtsııanyń habarlaýynsha, 6 mamyr kúni Jedel basqarma ortalyǵynyń 102 pýltine qala turǵyny 27 jastaǵy qyzyn urlap ketti dep habarlasqan. Áıeldiń aıtýy boıynsha, qyzynyń buryn birge turǵan er adamy onyń páterine zańsyz kirip, kúsh kórsetý men qorqytý arqyly qyzyn alyp, avtokóligimen belgisiz baǵytqa taıyp turǵan.
Jedel izdestirý sharasy aıasynda buryn sottalǵan 1990 jyly týǵan azamat Syǵanaq kóshesindegi úıdiń aýlasynda ustaldy.
«Atalǵan fakti boıynsha QR QK «Adam urlaý», «Qorlaý», «Turǵyn úıge qol suǵylmaýshylyqty buzý» baptary boıynsha sotqa deıingi tergeý júrgizilýde. Kúdikti Nur-Sultan qalasynyń PD ýaqytsha ustaý ızolıatoryna qamaldy. Qylmystyq isti tergeý polıtsııa departamenti basshysynyń baqylaýynda bolady», - dep atap ótti vedomstvoda.
