Elordada áıel 60-tan astam azamatty 500 mln teńgeden astam somaǵa aldap ketken
ASTANA. KAZINFORM — Sot úkimimen ol kináli dep tanylyp, 6 jyl 8 aı merzimge bas bostandyǵynan aıyrý jazasyna kesildi.
Astana qalasynda áıel adam aldaý jáne senimdi teris paıdalaný arqyly tanystaryna, kórshilerine jáne burynnan aralasatyn adamdarǵa qatysty birneshe ret alaıaqtyq áreketter jasaǵan. Onyń uzaq ýaqyt boıy jaýapkershilikten jaltarýyna jábirlenýshilermen aradaǵy senimdi qarym-qatynasy sebep bolǵan.
— Ol azamattardy óziniń túrli baılanystary men ıpotekany jedel rásimdeýge, turǵyn úı satyp alýǵa múmkindik beretin jaǵdaılary bar ekenine sendirip, jańylystyrǵan. Osy syltaýmen jábirlenýshilerdi ózine aqsha berýge, óz atyna nesıe rásimdeýge nemese jyljymaıtyn múlikterin kepilge qoıýǵa kóndirip, keıin alynǵan qarajatty ıemdenip otyrǵan. Sondaı-aq dekrettik tólemderdi rásimdeýge kómektesetinin aıtyp, paıyzben aqsha alyp, ony ústeme paıdasymen qaıtaratynyna ýáde bergenimen, óz mindettemelerin oryndamaǵan.
Máselen, jábirlenýshiniń senimine kirgen sottalýshy ony bankke eki bólmeli páterin 16 mln teńge kólemindegi nesıege kepilge qoıýǵa kóndirgen. Ol nesıeni ózi tóleıtinin jáne úsh bólmeli páter satyp alýǵa kómektesetinin ýáde etken. Alaıda alynǵan aqshany óz paıdasyna jumsaǵan. Bastapqyda nesıeniń bir bóligin tólegenimen, keıin tólemderdi toqtatyp, baılanysqa shyqpaı qoıǵan. Sonyń saldarynan jábirlenýshige 9 mln teńgeden astam materıaldyq zalal keltirilgen, — delingen habarlamada.
Taǵy bir jaǵdaıda áıel jábirlenýshiden onyń jubaıynyń dekrettik tólemin kóbeıtip berýge kómektesemin degen jeleýmen 5 mln teńgeden astam aqsha alyp, ýádesin oryndamaı, qarajatty tolyqtaı ıemdengen.
Jalpy alǵanda, onyń qylmystyq áreketteriniń saldarynan jábirlenýshilerge 500 mln teńgeden astam materıaldyq zalal keltirilgen.
Memlekettik aıyptaýshy sotta sottalýshynyń kinásin dáleldeıtin jetkilikti aıǵaqtardy usyndy. Sottalýshy kinásin ishinara moıyndap, jekelegen epızodtar boıynsha jasaǵan isine ókinish bildirdi.
Sot úkimimen ol kináli dep tanylyp, 6 jyl 8 aı merzimge bas bostandyǵynan aıyrý jazasyna kesildi.
Jábirlenýshilerge keltirilgen materıaldyq zalaldy óndirý týraly azamattyq talaptary qanaǵattandyryldy.
Sot úkimi zańdy kúshine endi.
Aıta ketelik Jambylda 25 myń teńge úshin TikTok-ta alaıaqtyq jasaǵan áıel 2,5 jylǵa sottalǵan edi.
