Elordada «Aıbyndy Altyn orda» atty kórme ashyldy

NUR-SULTAN. QazAqparat - QR Ulttyq akademııalyq kitaphanasynda 2020 jyldyń bastamasy retinde birneshe kitap kórmesi ótti. Sonyń biri - Altyn ordanyń 750 jyldyǵyna oraı uıymdastyrylǵan «Aıbyndy Altyn orda» atty kitap kórmesi, dep habarlaıdy QazAqparat tilshisi.

Kórmede Altyn orda memleketiniń qurylýyn, damý tarıhyn, kúıreýin baıandaıtyn 160-qa jýyq kitap, fotosýretter, kartalar men dáıeksózder usynyldy.

«Táýelsizdiktiń 10 jyldyǵynda Qazaqstan tarıhynyń 5 tomdyǵy shyǵaryldy. Sonyń ekinshi tomynda Qazaqstan memlekettiliginiń qalyptasýy, onyń ishinde Altyn orda, onyń qalyptasýy men damýy, ydyraý sebepteri men alǵysharttary jáne Qazaq handyǵynyń qurylýy, onyń Altyn ordanyń tikeleı murageri ekeni týraly aqparat bar. Qazaqstan memlekettiliginiń tarıhy Joshy han nemese Altyn orda tusynda ǵana qalyptasqan joq, onyń tarıhy tereńde jatyr», - deıdi QR BǴM Memleket tarıhy ınstıtýtynyń ǵylymı qyzmetkeri Qundyzaı Erimbetova.

Atalǵan kórme 3 bólimnen turady: Altyn orda memleketiniń qurylýy, Altyn orda memleketiniń damý tarıhy men ydyraýy jáne Ulytaý - handar mekeni.

Eske sala ketsek, buǵan deıin elordada «Álemdi jaqsy jaqqa ózgert» atty kitap jáne fotokórme ótkenin jazǵan bolatynbyz.