Elordada aıazdy kúni jolaqy tólemegen stýdentti avtobýstan túsirý faktisi tekserilýde
ASTANA. QazAqparat – Elordalyq City Transportation Systems kompanııasy aıazdy kúni stýdentti avtobýstan túsirip ketý týraly shaǵymǵa jaýap berdi, dep habarlaıdy QazAqparat tilshisi.
«Búgin meniń ulym avtobýstan túsirip ketti. Ol stýdent jáne sabaqtan kele jatqanda telefonynyń qýaty bitip, jolaqysyn tóleı almaǵan. Qolma-qol aqsha da bolmaǵan. Baqylaýshy adamgershilikpen qaramaı, avtobýstan túsirip ketken. Basqa kúnderi, aýa raıy jyly bolǵanda túsinýge bolady. Biraq mundaı aıazdy kúni emes», - dep shaǵymdandy Facebook qoldanýshysy.
Bul jaǵdaıǵa CTS kompanııasy túsinikteme berdi. Kóliktik baqylaý departamentiniń qyzmetkerleri jelige monıtorıng kezinde mundaı jaǵdaılarda profılaktıkalyq áńgimeler júrgiziletinin jáne eshkimdi joldan túsirmeıtinin aıtty.
Atalǵan shaǵymdy obektıvti qaraý úshin, avtobýstardan beınejazbany alý úshin qyzmetkerdiń aty-jónin, avtobýstyń memlekettik nemese garaj nómirin, oqıǵa bolǵan kún men ýaqyt, marshrýt nómirin naqtylaý qajet.
«Aıazdy kúni balalardy túsirip ketýge bolmaıdy degen arnaıy tyıym bar. Sonymen qatar, bala kólik kartasyn umytyp ketýi múmkin, bul jaǵdaıda onymen áńgime júrgiziledi jáne kólikten túsirilmeıdi. Biraq qazirgi jaǵdaıda bala emes, stýdent jol aqysyn tóleı almaǵan. Jolaqysyn tólemegeni úshin 2 AEK aıyppul salynatyny belgili. Ne bolǵanyn anyqtaý úshin ony teksergen qyzmetkerdiń famılııasyn, tolyq aqparatty kórsetý kerek, osylaısha biz beınejazbany alyp, shyn máninde ne bolǵanyn bile alamyz. Múmkin jolaýshyny túsirmegen shyǵar, ózi shyǵyp ketken bolar», - dep túsindirdi City Transportation Systems baspasóz qyzmeti agenttik saýalyna.
Kóliktik baqylaý departamentiniń qyzmetkerleri jolaýshylardy túsirmeıdi. Biraq jol aqysyn tólemegen adamdy anyqtasa, sáıkesinshe aıyppul sala alady.
Kompanııa elordada jolaýshylar men bagajdy avtomobıl kóligimen tasymaldaý erejelerine sáıkes, jelidegi barlyq qyzmetkerlermen fýnktsıonaldyq mindetterin tıisinshe oryndaý týraly profılaktıkalyq áńgimeler júrgiziletinin aıtty.
