Elordada Aıaz atanyń rezıdentsııasy jumysyn bastady
ASTANA. QazAqparat - Búgin elorda saıabaǵynda Aıaz ata rezıdentsııasy óz jumysyn bastady, dep habarlaıdy QazAqparat ákimdiktiń medıa ortalyǵyna silteme jasap.
Aıaz ata - jańa jyldyń basty keıipkeri. Ony ár elde ártúrli ataıdy. Bar álemniń balalary armandardy oryndaýshy ataǵa hatty da ár túrli meken-jaı boıynsha jazady. Sondaı-aq, balalar Aıaz atanyń rezıdentsııasyna saıahat jasaıdy.
Búgin Elorda saıabaǵynyń aýmaǵyndaǵy erekshe úıde barlyq kelýshilerdi Aıaz ata, Aqshaqar men Olaf esimdi kóńildi aqqala qarsy aldy.
Ertegi keıipkerleri kishkentaı qonaqtarǵa jańa jyldyq kóńil-kúı syılaǵan bolatyn. Aıaz atanyń úıinde kelýshilerdiń barlyǵy estelik sýretke tústi. Balaqaılar Aıaz ataǵa taqpaqtary men ánderin aıtyp, ózine tıesili tátti syılyǵyn aldy.
«Meni munda ata-anam ertip keldi. Bul jer maǵan qatty unady. Men ertegige engendeı boldym. Men Aıaz ataǵa ózimniń súıikti ánimdi oryndap berdim. Ol maǵan kámpıtterdi syılady. Osyndaı jerdiń bolǵany meni qatty qýantady», - dep áserimen bólisti qalanyń kishkentaı turǵyny Janel Kenjebolat.
Rezıdentsııada búldirshinderdi, kele jatqan meırammen ertegi keıipkerleri de quttyqtady.
Balalardyń kóńil-kúıin kóterýge arnalǵan oıyn-saýyqtyń bul túri tegin ekendigin atap ótken jón.
Aıaz atanyń rezıdentsııasy 10 qańtarǵa deıin jumys kúnderi saǵat 18:00-den, demalys kúnderi saǵat 12:00-den ashyq bolady.
