Elordada Aıaz ata turǵyndarmen birge marafonǵa qatysty
«Bizdiń basty maqsatymyz sportty nasıhattaýǵa, jastardy salaýatty ómir saltyna jappaı tartýǵa negizdelip otyr. Bul shara «Kúsh-jiger, jastyq shaq, densaýlyq» taqyrybymen ótip jatyr. Ómirde 25 jas degen adam úshin kúsh-jigerdiń tolyq boıyna jınalǵan kezeńin bildiredi. Qazirgi elimiz de Táýelsizdiginiń 25 jylynda kúsh-qaıratyn nyǵaıtqan shaǵyna jetip otyr. Osy sımvoldyq máni bar datany nazarǵa alyp, jastar arasynda sportty nasıhattaý naýqanyn júrgizip jatyrmyz», - dedi Astana marafonshylar klýbynyń tóraǵasy Talǵat Erǵalıev.
Onyń sózine qaraǵanda, marafonǵa kez kelgen adam qatysa alady. Aldaǵy ýaqytta bul qysqy marafondy jyl saıyn dástúrli túrde uıymdastyrý josparda bar. Sonymen qatar marafonǵa qatysýshylar arasynda jas ereksheligine qaraı shekteý bolmaıdy.
«Baıqasańyzdar, osy sporttyq sharaǵa jastardan bastap, jasy 70-ten asqan qarııalar da bar. Bul turǵyda jarysta birinshi kelý maqsat emes, eń bastysy, marafonǵa kópshilikpen birge qatysýǵa», - dediT. Erǵalıev.
Aıta keteıik, qatysýshylar 2500 metrlik qashyqtyqta júgirip ótti. Sporttyq jarysqa Astana turǵyndary, sondaı-aq ózge qalalardan kelgen sportshylar men sharaǵa qatysýǵa nıet bildirgen azamattar qatysty. Jaqsy nátıjege kórsetkenderge gramotalar men dıplomdar tapsyryldy.
Óz kezeginde QR Parlamenti Májilisiniń depýtaty Abaı Tasbolatov júgirý jarystaryna erteden turaqty turde qatysyp kele jatqanyn aıta kele, «Táýelsizdigimizdiń 25 jyldyǵyna oraı osyndaı marafon uıymdastyrlyp otyr. Demalys kúni adamdy sergitetin bundaı sporttyq sharalardan qalmaý kerek. Júıeli túrde júgirý arqyly densalyqty shynyqtyrý kerek. Búgingi marafonda da jastarmen birge sońyna deıin qatysýǵa nıettimin», - dedi.
Sharany Astana ákimdiginiń qoldaýymen «Qazaqstan qurylysshylar odaǵy» respýblıkalyq zańdy tulǵalar birlestigi jáne «Astana Jelaıaǵy» astanalyq marafonshylar klýby qoǵamdyq birlestigi uıymdastyrdy.
