Elordada avtoturaq aqysyn kólik ıeleriniń 10 paıyzy ǵana tólegen
ASTANA. QazAqparat - Eki jarym aıdyń ishinde aqyly avtoturaqtyń qyzmetin 3 myńnan astam kólik ıesi paıdalanǵan, dep habarlaıdy QazAqparat qala ákimdiginiń saıtyna silteme jasap.
«Parkovochnoe prostranstvo Astany» JShS-nyń málimetinshe, kólik ıeleriniń basym bóligi aqyly avtoturaqty birneshe kún, apta qoldansa da aqparatty qasaqana elemeı kelgen. Olar aqyly kommýnaldy turaqtyń qyzmeti úshin tólemeıdi nemese óz kólikterin tyıym salynǵan jerlerge qoıady.
«Búgingi kúnge deıin aqyly avtoturaq qyzmetin 3 myńǵa tarta júrgizýshi paıdalanǵan. Naqty jaǵdaıǵa keler bolsaq, kólik ıeleriniń 10% ǵana avtoturaqqa kólikterin qoıǵany úshin aqy tóleıdi. Bizde avtoturaq úshin tóleý mádenıeti qalyptaspaǵan. Keıbir kólik basqarýshylar avtoturaqtardy «óziniń jeke» turaǵy retinde birneshe kún, apta qoldanyp, aqparatty qasaqana elemeıdi. Bul joba aıaq asty joba emes. Ol - Astanadaǵy ınfraqurylymdy damytýdyń mańyzdy kezeńderiniń biri», - delingen «Parkovochnoe prostranstvo Astany» JShS-nyń habarlamasynda.
Eske salaıyq, «Nurjol» jelekjolyndaǵy aqyly avtoturaqtar 15 qańtarda jumysyn bastaǵan bolatyn. Munda kóligin qoıǵany úshin júrgizýshiler saǵatyna 100 teńge tóleıdi. Nurjol jelekjolyndaǵy aqyly avtoturaqta 487 oryn men 12 parkomat bar.
Júrgizilgen saraptama klıentterdiń avtoturaq qyzmeti úshin tólemdi mobıldi qosymsha jáne 2888.kz saıtyndaǵy jeke kabıneti arqyly júzege asyrýdy qalaıtyndaryn kórsetip otyr.
Eske sala ketsek, avtoturaq qyzmetin tólemegen kólikterdiń tizimi jasalǵan.
