Elordada avtomektepti aıaqtaǵany jóninde jalǵan kýálik bergender isi tergelýde

NUR-SULTAN. QazAqparat – QR Sybaılas jemqorlyqqa qarsy is-qımyl agenttiginiń Nur-Sultan qalasy boıynsha departamenti tarapynan avtomektepti aıaqtaǵany jóninde jalǵan qujat bergender isi tergelýde, dep habarlaıdy QazAqparat tilshisi.

Atalǵan departament basshysy Shyńǵys Qabdýlanyń aıtýynsha, qalalyq mamandandyrylǵan HQKO-da júrgizýshi kýáligin alý úshin avtomektepti aıaqtaǵany jóninde jalǵan kýálik berýdi uıymdastyrǵan kúdiktiler tobyna qatysty sotqa deıingi tergeý júrgizilýde.

«Tergeý amaldary barysynda mektepti aıaqtaǵany týraly qoltańba men mór basylǵan kýálikterdiń blankileri anyqtaldy. Osy iske baılanysty kúdiktiler ustaldy. Qylmystyq qýdalaý sharalarymen júrgizýshi kýáligin zańsyz alǵandar qamtylyp otyr. Biz osy adamdardy anyqtaýmen aınalysýdamyz. Bizde 3 myńnan astam osyndaı zańsyz kýálik berilgen», - dedi Shyńǵys Qabdýla Astana Adaldyq Alańy-nyń áleýmettik jelidegi paraqshasynda ótken brıfıngide.

Budan buryn habarlanǵandaı, 9 aıda departament tarapynan 177 sotqa deıingi tergeý tirkeldi.