Elordada avtokólik ıeleri LRT qurylysshylaryna shaǵymdanyp jatyr
ASTANA. KAZINFORM — Astanada LRT nysandaryn syrlaý jumystary bastalyp, budan kólikterge zııan kelgen.
Áleýmettik jelide LRT qurylysshylary avtokóligine boıaý shashyratqany týraly shaǵymdanǵan elorda turǵynynyń vıdeosy tarady. Avtordyń aıtýynsha, ol 16 mamyrda kóligin áýejaıdyń qyzmettik parkınginde qaldyrǵan.
— Kólikke boıaý shashyraǵan, jurttar LRT-ny boıady dep jatyr, sodan mashınaǵa shashyraǵan, — deıdi er adam.
Sondaı-aq vıdeo avtory oqıǵa ornyna polıtsııa shaqyrǵanyn aıtady.
Іstiń mán-jaıyn surap LRT qurylysyna jaýapty City Transportation Systems (CTS) kompanııasynyń baspasóz qyzmetine júgingen edik. Bizge berilgen málimetke sáıkes, syrlaý jumystarynyń júrgiziletini týraly eskertý taqtaıshasy ilingen. Biraq habarlandyrý mátininde qate ketkendikten, taqtaısha alynyp tastalǵan. Keıin ornyna qaıta qoıylmaǵan.
— 1 mamyrdan bastap Astanadaǵy jeńil relsti kólik (LRT) jelisinde estakada tirekteri men arqalyqtaryn syrlaý jumystary júrgizilip jatyr. Syrlaý úshin zamanaýı ári fýnktsıonaldy ashyq sur RAL 7047 (Telegrey 4) túsi tańdaldy. Bul reńk estetıkalyq jaǵynan tartymdy jáne praktıkalyq qasıetke ıe, ol lastanýǵa, shań men aýa raıy jaǵdaıyna tózimdi. Arnaıy lak, ıaǵnı boıaý quramy qurylymdardy ýltrakúlgin sáýlelenýden, ylǵaldan, temperatýra aýytqýlarynan jáne mehanıkalyq áserlerden senimdi qorǵaıdy. Sonymen qatar, bul jabyn ekologııalyq qaýipsiz jáne zamanaýı standarttarǵa tolyq sáıkes keledi, — dep túsindirdi kompanııadan.
LRT qurylysyn syrlaý jumysy kezeń-kezeńimen júrgizilmek.
Aıta ketsek, elordadaǵy LRT relsiniń 25 paıyzy tóseldi. Bıyl kúzde testilik rejımde iske qosylady.
Eske salaıyq, elorda ákimi Jeńis Qasymbek LRT-de jol júrý baǵasy qansha bolatynyn aıtty.