Elordada avtobýstar kúnnen-kúnge kóbeıe beredi - CTS
NUR-SULTAN. QazAqparat – Tótenshe jaǵdaı rejıminen keıin elordadaǵy qoǵamdyq kólik jumysy jandanyp keledi. City Transportation Systems kompanııasynyń dırektory Bekmyrza Igenberdınov jýrnalısterge qoǵamdyq kóliktiń jumys tártibin túsindirdi, dep habarlaıdy QazAqparat tilshisi.
Onyń aıtýynsha, qala ishindegi avtobýstar ázirge saǵat 07:00-den 21:00-ge deıin júredi.
«12 mamyrda - alǵashqy jumys kúni 146 907 jolaýshy qoǵamdyq kólikpen júrdi. Onyń ishinde 2 787 oqýshy, 36 884 jeńildigi bar azamat bar. 13 mamyr kúni jolaýshylar aǵyny - 205 295 adam boldy, onyń 3 686 - oqýshylar, 48 418 – jeńildigi bar azamattar. Karantınge deıin kúnine 762 myń adam júretin. Qazir jelide barlyq qalalyq baǵdarlar bar, qala mańyna qatynaıtyn baǵdarlar ekinshi kezeńde shyǵady», - deıdi B. Igenberdınov.
Karantınge deıin elordada 872 avtobýs jumys istegen edi. Al 12 mamyrda qoǵamdyq kólik shyqqan kúni jelide – 450 avtobýs júrdi, 13 mamyr kúni – 490 bolsa, 14 mamyrda - 530 avtobýs qatynaýda.
Spıkerdiń aıtýynsha, qazir avtobýs ishindegi jolaýshylar sany 50%-dan aspaýy tıis.
«Qarbalas ýaqytta avtobýs ishinde bul talaptar oryndalmaýy múmkin. Keıbir jolaýshylar sanıtarlyq talaptarǵa qaramastan, adam toly avtobýsqa minýge tyrysady. Júrgizýshilerge de jaǵdaıdy qadaǵalaýdy tapsyryp jatyrmyz. Kompanııamyzdyń 250 qyzmetkeri avtobýstardyń tolýy men ıntervalyn qadaǵalaýǵa shaqyryldy. Olar aıaldamalarda turyp, beınekameralar boıynsha tekserý júrgizedi. Jalpy alǵanda, jumys naqty jolǵa qoıylǵan», - dedi B. Igenberdınov.
Sonymen birge, CTS basshysy jolaýshylardyń da áleýmettik jaýapkershilik tanytyp, sanıtarlyq erejelerdi saqtaýyn surady.
«Barlyq avtobýstar ádettegideı sońǵy aıaldamaǵa jetken saıyn dezınfektsııadan ótedi. Avtobýs júrgizýshileri de barlyq qaýipsizdik sharalaryn saqtaıdy: betperde, qolǵap kıip, antıseptıkterdi qoldanady. Jalpy dezınfektsııa avtobýs parkinde júrgiziledi», - dedi Bekmyrza Igenberdınov.
Eske sala ketsek, barlyq tarıftik josparlar burynǵydaı jumys isteıdi. 18 jasqa deıingi balalar arnaıy karta bolsa, tegin júre alady. Tegin aýysýǵa múmkindik beretin arnaıy tarıf te bar.
