Elordada «avtobýs» jedel aldyn alý is-sharasy bastaldy
ASTANA. Qańtardyń 6-sy. QazAqparat /Marlan Jıembaı/ - Keshe elordada bastalǵan «Avtobýs» jedel aldyn alý is-sharasy qańtardyń 9-yna deıin jalǵasady.
Bul týraly búgin Astana qalalyq ІІD-inde ótken aptalyq brıfıngte atalǵan vedomstvonyń Memlekettik til jáne aqparat bóliminiń bastyǵy Nurdildá Oraz aıtty.
Onyń aıtýynsha, ótken jyly qoǵamdyq kólik júrgizýshileriniń kinásinen 12 jol-kólik oqıǵasy tirkelip, sonyń saldarynan 1 adam qaza tapsa, 13 adam túrli dene jaraqattaryn alǵan. Osyǵan oraı jol polıtsııasynyń qyzmetkerleri qoǵamdyq jolaýshylar kólikteriniń qatysýymen oryn alatyn apattardyń, jol qozǵalysy jáne jolaýshylar tasymaldaý erejeleriniń buzylýynyń aldyn alý, sondaı-aq kóliktegi aqaýlardy anyqtaý maqsatynda atalǵan is-sharany qolǵa alyp otyr. Shara barysynda Jol polıtsııasy basqarmasy men Jolaýshylar tasymaly jáne avtomobıl joldary basqarmasynyń qyzmetkerleri avtobýstardy sońǵy aıaldamalarǵa deıin teksermek. Oǵan eki basqarmadan da arnaıy qyzmetkerler bólingen.
«Ol qyzmetkerler azamattyq kıimmen jolaýshy retinde avtobýsqa minip, júrgizýshiniń qandaı jol erejesin buzǵandyǵyn baqylap otyrady. Sońǵy aıaldamaǵa kelgen soń jol erejesi buzylǵan jaǵdaıda qoǵamdyq kólik júrgizýshisine ákimshilik hattama toltyrady», deıdi N.Oraz.
