Elordada avtobýs aıdap kele jatqan júrgizýshi esinen tanyp, aýrýhanada kóz jumdy
ASTANA. QazAqparat – Elordadaǵy qalalyq avtobýs júrgizýshisiniń jol boıynda densaýlyǵy kúrt nasharlap, keıinnen ol aýrýhanada kóz jumdy, dep habarlaıdy QazAqparat tilshisi.
City Transportation Systems kólik kompanııasynyń málimetinshe, bul jaǵdaı búgin saǵat 10:20-da Bógenbaı batyr dańǵyly boıyndaǵy «Beıbitshilik» aıaldamasy mańynda bolǵan.
«1961 jylǵy júrgizýshi óz baǵdarymen kele jatqanda esinen tanǵan. Sonyń saldarynan avtobýs qorshaý men jaryqtandyrý baǵanyna soǵylyp, odan keıin jaıaý júrginshilerge arnalǵan jolaqqa shyǵyp ketken. Júrgizýshi shuǵyl túrde aýrýhanaǵa jetkizilgenimen, esin jımastan kóz jumdy. Aldyn ala málimet boıynsha onyń júregi toqtap qalǵan», - delingen atalǵan kompanııa taratqan aqparatta.
Ol jolaýshylar kóliginde júrgizýshi retinde 15 jyldan astam ýaqyt boıy qyzmet etken. Reıske shyǵar aldynda tańerteń saǵat 5:54-te medıtsınalyq tekserýden ótken. Oqıǵa saldarynan basqa adamdar zardap shekpegen.
