Elordada avtobýs aıaldamasyndaǵy apat boıynsha tekserý bastaldy
NUR-SULTAN. QazAqparat - Elodada Sh. Qaldaıaqov kóshesi boıyndaǵy jol-kólik oqıǵasy saldarynan avtobýs aıaldamasynyń buzylýy faktisi boıynsha tekserý júrip jatyr. Bul týraly Nur-Sultan qalasy Polıtsııa departamentiniń baspasóz qyzmetinen málim boldy, dep habarlaıdy QazAqparat tilshisi.
Aldyn ala málimet boıynsha búgin tús kezinde «Toyota Camry» markaly avtokóligi janama joldan shyǵyp, Sh. Qaldaıaqov kóshesi boıymen kele jatqan «Bentley» kóligine jol bermegen. Qaqtyǵys saldarynan «Bentley» avtomashınasy ekpinmen aıaldamaǵa baryp soǵyldy. Endi osy jol-kólik oqıǵasy boıynsha tekserý sharalary júrip jatyr. Osy oraıda kólik jyldamdyǵy, «Sergek» kameralaryndaǵy málimetter qaralady.
«Oqıǵadan zardap shekkender joq. «Toyota Camry» kóligin basqarǵan áıel adam men onyń janyndaǵy balany dárigerler tekserdi. Densaýlyq jaǵdaılaryna qaýip bolmaǵandyqtan, olar úılerine jiberildi», - dep naqtylady baspasóz qyzmetinen.
