Avtobýs apatynda 2 aıaǵynan aıyrylǵan qyzdyń otbasyna baspana beriledi – Jeńis Qasymbek

ASTANA. KAZINFORM – Elordada avtobýstyń jol apatyna túsýi saldarynan eki aıaǵynan aıyrylǵan qyzdyń otbasyna ákimdik tarapynan baspana beriledi. Bul týraly búgin Astana qalasynyń ákimi Jeńis Qasymbek aıtty.

- Ol kisige, qyzyna, otbasyna birneshe ret meniń áriptesterim, onyń ishinde orynbasarym bardy. Keshe balalar ombýdsmeni baryp qaıtty. Búgin de túske taman orynbasarym sol kisilermen birge taǵy barady. Kómek jaǵyna keler bolsaq, saqtandyrýy 20 mln teńge shamasynda jáne ákimshilik 10 mln teńge berdi. Qosymsha 10 mln teńge beremiz dep josparlap otyrmyz. Sonymen qatar baspana máselesin sheship beremiz. Ony sizderge resmı túrde aıtyp otyrmyz. Baspana máselesi sheshiledi, - dedi qala ákimi Aqordada BAQ ókilderiniń saýalyna oraı.

Buǵan deıin habarlaǵanymyzdaı, 2 maýsymda Astanada avtobýs júrgizýshisi rólge ıe bola almaı, jol jıegindegi baǵanǵa soǵyldy. Jedel medıtsınalyq járdem brıgadalary qala statsıonarlaryna barlyǵy 15 adamdy jetkizdi. Olardyń úsheýi aýrýhanaǵa jatqyzyldy. Jol apaty kezinde zardap shekken qyz balanyń aıaǵyna ampýtatsııa jasaldy.

Avtobýs júrgizýshisi ýaqytsha ustaý ızolıatoryna qamaldy. Tergeý amaldary júrgizilip jatyr.