Elordada Avıatorlar alleıasy ashyldy
Shara áýejaıdyń 90 jyldyq mereıtoıyna arnalyp otyr. ıAǵnı, nysannyń tarıhy 1931 jyldan beri bastalady. Bul jyly qazirgi áýejaıdyń ornynda birinshi áýe alańy qurylyp, 1948 jyldan bastap aýyr ushaqtardy qabyldaı alatyn áýe baılanysy jolǵa qosylady. 2020 jyldyń maýsymynda Nur-Sultan áýejaıy resmı túrde kodyn NQZ dep ózgertti. Sharany uıymdastyrýshylar 90 jyldyqqa arnalǵan aǵash egý sharasy osy ataýly kúnmen sáıkes kelgenin aıtady.
Nursultan Nazarbaev Halyqaralyq áýejaıynyń basqarma tóraǵasy Ǵabıt Tájimuratov avıatorlar alleıasy áýejaıdyń 90 jyldyǵyna arnalǵanmen, onda egiletin alǵashqy 30 aǵash táýelsizdiktiń 30 jyldyǵyna arnalatynyn eskertti.
«Bıyl áýejaıymyzǵa 90 jyl tolyp jatsa, elimizdiń táýelsizdik alǵanyna 30 jyl tolyp otyr. Búgingi alleıanyń ashylýy – 90 jyldyqqa arnalǵan sharalardyń bireýi ǵana. «Avıatorlar baǵynda» Táýelsizdiktiń 30 jyldyǵyna arnap 30 aǵash ekpekshimiz», - degen áýejaı basshysy pandemııa ákelgen shekteýlerdiń zardabyn qalaı eńsergenderin de qysqasha baıandady.
«Byltyr áýejaılar úshin óte qıyn jyl boldy. Soǵan qaramastan ujymdy saqtap qaldyq. Halyqaralyq reıster azaısa da, júk tasıtyn reıster men basqa da tranzıttik reısterdi kóbeıttik. Sonyń arqasynda ózimizdiń ujymymyzdy saqtap qaldyq» - dedi Ǵabıt Tájimuratov.
Elorda depýtattarynyń atynan sóz alǵan Nur-Sultan qalasynyń máslıhat hatshysy Erlan Kanalımov Nazarbaev Halyqaralyq áýejaıy Qazaqstannyń kelbetine aınalǵan erekshe nysan ekenine toqtaldy.
«Kez kelgen týrıst pen qonaqtyń ózi kelgen el týraly kózqarasy osy áýejaıdan qalyptasady. Sol sebepti búgingi elorda áýejaıy ujymynyń júıeli jumysynyń arqasynda, solardyń talpynysynyń arqasynda, basshylyǵynyń uıymdastyrý qabiletiniń arqasynda elge kelgen meımandar, Qazaqstannyń ár túkpirinen ushyp keletin otandastarymyz árqashan oń baǵasyn beredi dep olaımyn. Tabysqa jete berińizder», - dep quttyqtady Erlan Kanalımov,
Táýelsizdiktiń 30 jyldyǵyn beıneleıtin alǵashqy 30 aǵashtyń árqaısysy halyqaralyq áýejaımen qanattasyp jumys isteıtin memlekettik organdar men uıymdardyń atynan egildi. Sonyń ishinde «QazAqparat» halyqaralyq aqparat agenttiginiń atynan da shyrsha egilip, belgi qaǵyldy.
