Elordada aýyr patologııaǵa shaldyqqan jas ana qutqaryldy
ASTANA. QazAqparat - Elordanyń medıtsına mamandary sırek kezdesetin dıagnozy bar jas anany qutqaryp qaldy, dep habarlaıdy QazAqparat tilshisi.
«Bul jaǵdaıdyń ereksheligi - aıaǵy aýyr áıelge kúrdeli kardıohırýrgııalyq otanyń jasalǵany. Bizdiń dárigerlerdiń jedel ári jınaqy is-áreketiniń arqasynda eki adam - ana men bala aman qaldy», - deıdi №1 perınataldyq ortalyqta ótken baspasóz máslıhatynda Astana qalalyq qoǵamdyq densaýlyq saqtaý basqarmasy basshysynyń orynbasary Álııa Rústemova.
Onyń aıtýynsha, osy jyldyń qyrkúıek aıynda №2 qalalyq kópsalaly aýrýhananyń akýsher-blogyna jedel túrde júrektiń sozylmaly qolqanyń jetkiliksizdigi jáne arterıaldyq qysymnyń ótkirligimen aıaǵy aýyr áıel túsken. Osydan keıin jedel túrde zertteý jumysy júrgizilip, áıeldi barlyq salalyq mamandar teksergen. Aqyry, álgi áıelge qolqanyń joǵarǵy bóliginiń ótkir qabattalǵan anevrızmi dıagnozy qoıylǵan.
«Qoǵamdyq densaýlyq saqtaý basqarmasynyń basshylyǵy, aýrýhana basshylyǵy quramyna engen konsılıýmnyń sheshimimen jedel túrde ota jasaý týraly sheshim qabyldandy. Otany bir ýaqytta eki brıgada - kardıohırýrgter men akýsher-gınekologtar júrgizdi. Kardıohırýrgııalyq ota jaǵdaıynda kezeń-kezeńmen shuǵyl túrde bosandyrý júrgizildi - salmaǵy 3,1 kelilik sábı ómir esigin ashty. Ekinshi kezeńde kardıohırýrgter brıgadasy iske kirisip, óziniń ota jumysyndaǵy qyzmetin atqardy. 13 táýlik boıy bizdiń patsıent jan saqtaý bóliminde jatty. Osydan keıin ol bólimge aýystyryldy. Qazir onyń jaǵdaıy turaqty. Densaýlyǵy jaqsaryp keledi. Ózin jaqsy sezinedi», - deıdi Álııa Rústemova.
Eske sala ketsek, osy jyldyń maýsym-shilde aılarynda elordadaǵy №1 perınataldyq ortalyqta úsh áıel kóz jumǵan edi.
Arada kóp ótpeı 4 qyrkúıekte atalmysh perzenthanada taǵy bir ana kóz jumyp, osy sebepti 4 ana ólimi bolǵan perzenthananyń bas dárigeri qyzmetinen bosatylǵan bolatyn.
