Elordada aýyl jastarynyń II Respýblıkalyq forýmy ótti
«Aýyl jastarynyń forýmyn endi jyl saıyn ótkizýdi josparlap otyrmyz. Jastarǵa qatysty túıini sheshilmegen, sóz júzinde ǵana aıtylyp júrgen másele kóp. Solardyń biri – jastardy jumysqa ornalastyrý. Bizdiń maqsat – jastarǵa jumysqa ornalasý jolyn kórsetip, júıesin úıretý. Bıyldyń ózinde bizdiń partııa tarapynan keminde 16 myń adamdy qamtıtyn baılanys ortalyǵy onlaın rejımde jumys istedi. Bolashaqta bizdiń fılıaldarymyzda tikeleı qarjylandyrýmen aınalysatyn qurylymymyz bolady dep oılaımyn», - dedi «Aýyl» halyqtyq - demokratııalyq patrıottyq partııasynyń tóraǵasy Álı Bektaev forýmnyń ashylý saltanatynda.
Ol ekinshi másele – jastardy baspanamen qamtamasyz etý ekenin aıtty.
«Jastardy turǵyn úımen qamtamasyz etýde qalys qalyp jatqan másele kóp. Jastardyń ıpotekaǵa úı alýǵa jaǵdaıy kelmeı jatady. Osyny júıelendirý kerek. Sondaı-aq, aýyldaǵy bilim sapasy, medıtsınalyq qyzmet sapasynyń tómendigi aýyldaǵy jastardyń qalaǵa jappaı kóshýine sebepshi bola ma dep qorqamyz. Damyǵan memleketterde aýyldaǵy turǵyndar qalaǵa kelip, nápaqasyn taýyp, aýylyna demalýǵa ǵana barady. Ol memleketter men Qazaqstandy salystyrýǵa bolmaıdy, sebebi bizdiń eldiń ekonomıkalyq jaǵdaıy da, jer kólemi de basqasha», - deıdi ol.
Onyń aıtýynsha, memlekettiń qaýipsizdigi – azyq-túlik.
«Azyq-túlikti óndirip jatqan aýyl sharýashylyǵy. Sol sebepti aýyl – bizdi asyrap jatqan kıeli oryn. Aýyldan bári kóship ketetin bolsa undy kim shyǵaryp, astyqty kim orady, maldy kim baǵady? Sol sebepti memleket úshin aýylǵa jaǵdaı jasaý birinshi kezekte turatyn másele bolýy kerek. Partııa tóraǵasy retinde Premer-Mınıstrdiń atyna aýyldardy damytý jóninde depýtattyq saýal joldamaqshymyn. Elimizde bolashaǵy joq aýyl degen bolmaýy kerek. Eger jaqsylap jaǵdaı jasaıtyn bolsaq kez kelgen aýyldyń bolashaǵy zor. Jaǵdaı jasalsa eshkim úıin, malyn, jerin tastap eshqaıda ketpeıdi», - dep atap ótti Álı Bektaev.
