Elordada aýladaǵy kólikti evakýatorǵa tıep, urlap ketken
NUR-SULTAN. QazAqparat – Nur-Sultan turǵyndarynyń biri belgisiz bireýler «Hýndaı Aktsent» markaly kóligin urlap ketkendigin habarlap, polıtsııaǵa aryzdanǵan. Onyń aıtýynsha, kóligi ózi úsh kúndik issaparda júrgen kezde qoldy bolǵan, dep habarlaıdy QazAqparat tilshisi qalalyq polıtsııa departamentiniń baspasóz qyzmetine silteme jasap.
Kólik urlaǵan adamdar kópke uzamapty. Olardyń izine túsken polıtsııa kúdikti retinde 34 jáne 29 jastaǵy eki jigitti ustaǵan. Tergeý barysynda anyqtalǵanyndaı, kúdiktiler aýlada qar basyp turǵan kólikti kórip, aıdap áketýge kelisken. Kóliktiń esigin ashý úshin habarlandyrý arqyly «avtomedvejatnıkke» júgingen. Urylardyń biri kelgen mamandy kóliktiń ıesi ekendigine sendirgen. Solaı kiltin jasatyp alǵan. Osylaısha, keshke qaraı evakýator alyp kelip, mashınany alyp ketken.
«Evakýatordy da kúdiktiler habarlandyrý saıty arqyly shaqyrǵan. Júrgizýshisine 10 myń teńge tólep, kólikti kúdiktilerdiń biri turyp jatqan úıdiń aýlasyna jetkizgen», - deıdi Nur-Sultan qalasynyń Polıtsııa departamenti Saryarqa aýdandyq polıtsııa bólimi bastyǵynyń orynbasary Rýslan Temirbaev.
Ustalǵan jigitter kinásin moıyndap otyr. Ekeýi de ýaqytsha oqshaýlaǵyshqa qamalǵan. Atalǵan is boıynsha Qylmystyq kodekstiń 188-baby boıynsha qylmystyq is qozǵaldy. Qylmys tolyq dáleldengen jaǵdaıda olar 7 jylǵa deıin bas bostandyǵynan aıyrylýy múmkin.
