Elordada aýyr júk kólikteri qozǵalysyna baqylaý kúsheıtildi

ASTANA. KAZINFORM — Astanada aýyr salmaqty avtokólikter qozǵalysyn baqylaýdy kúsheıtti. 

Kólik mınıstrligine qarasty avtomobıl kóligi jáne kóliktik baqylaý komıtetiniń málimetinshe, atalǵan shara joldardyń merziminen buryn tozýyn aldyn alýǵa jáne elordada jol qozǵalysy qaýipsizdigin arttyrý maqsatynda qolǵa alyndy.

Kóliktik baqylaý jumysyn atqarý úshin 6 jyljymaly beket pen 40-qa jýyq ınspektor jumyldyrylǵan.

Elordada júk kólikteri qozǵalysyn baqylaý bıyl 7 naýryzda kúsheıtildi, atalǵan shara bıyl qyrkúıekke deıin jalǵasady jáne aldaǵy ýaqytta baqylaýdy kúsheıtý barlyq óńirde engiziledi.

— Baqylaý jumysy jyljymaly beketter men arnaıy avtomattandyrylǵan ólsheý stantsııalary arqyly qalanyń negizgi kireberis joldarynda júzege asyrylyp jatyr. 1400-den astam júk kóligi tekserilip, 600-den hattama toltyryldy, — deıdi mamandar.

Kóliktik baqylaý komıtetiniń málimetinshe, ruqsat etilgen normadan tys júk tasý joldardyń merziminen buryn tozýyna ákeledi. Sondyqtan da belgilengen júk tasý parametrlerin qatań saqtaý qajet.

Birer aı buryn «QazAvtoJol» UK» AQ kóktemde ýaqytsha júristi shekteýdiń jyl saıynǵy qoldanylý merzimderine sáıkes jeke bilikke túsetin júktemesi 8 tonnadan artyq avtokólik quraldarynyń júrisine shekteý engiziletinin habarlaǵan edi. 

Eske salaıyq, byltyrdan bastap tehnıkalyq reglamentke sáıkes kelmeıtin júk kólikterin elge kirgizbeý úshin tekserý júrgizile bastady.