Elordada Aýǵan soǵysynda qaza tapqandardy eske aldy
ASTANA. QazAqparat - Jyl saıyn 15 aqpan kúni Astanada Aýǵanstanda 10 jylǵa jýyq jalǵasqan soǵysqa qatysqan ınternatsıonalıst-jaýyngerlerdi eske alý kúni atap ótiledi. Keńes áskerleriniń shekteýli kontıngentin Aýǵan aýmaǵynan shyǵarylǵanyna 28 jyl toldy, dep jazady astana.gov.kz.
Búgin Astanada ınternatsıonalıst-jaýyngerlerdiń eskertkishine gúl shoqtaryn qoıý rásimi ótti, oǵan Astana q. ákimdiginiń Іshki saıasat basqarmasy basshysynyń orynbasary Qaırat Qambarov, general-leıtenant Baqytjan Ertaev, «Boevoe bratsvo» RF Halyqaralyq ardagerler odaǵynyń ókili Gennadıı Shorohov qatysty.
«Osy jerde turǵandardyń árbiri áskerı jyldardyń synaǵyn bastan keshirdi. Osy kúnge jetpegen aıypsyz jandar qanshama. Kandagarda, Qundyzda, Pansherde jáne Geratta erlikpen qaza tapqan jaýyngerlerimizdi qurmetpen eske alamyz. Olardyń esimderi bizdiń júregimizde máńǵgi saqtalady. Soǵys oty tutanbasyn, árqashan beıbitshilik pen kelisim bolsyn», - dedi Qaırat Qambarov.
Memorıal basynda Aýǵan soǵysynyń ardagerleri, «Nur Otan» partııasynyń músheleri, qaza tapqandardyń týǵan-týystary, qala bıliginiń jáne qoǵamdyq uıymdardyń ókilderi, orta jáne joǵary oqý oryndarynyń stýdentteri, Astanada ornalasqan áskerı bólimshelerdiń ókilderi jınaldy.
Aýǵan soǵysyna 22 269 qazaqstandyq attanyp, sonyń 324-i qaza tapty, 1015 jerlesimiz múgedek atansa, 21-i iz-tússiz joǵaldy.
Shara sońynda jınalǵandar ınternatsıonalıst-jaýyngerlerdi bir mınýt únsizdikpen eske aldy.
