Elordada aýǵan soǵysy ardagerleri bas qosty
ASTANA. 2 shilde. QazAqparat - Qazaqstan Respýblıkasy Parlamenti Májilisiniń depýtaty Bahytbek Smaǵuldyń jetekshiligimen Aýǵanstan soǵysy Ardagerleri uıymynyń oblystardaǵy tóraǵalary Keńes áskerlerin Aýǵanstannan shyǵarylýynyń 25 jyldyǵyna oraı jáne «QR Ardagerleri týraly» Zań jobasyn talqylaý úshin bas qosty. Bul týraly QR Parlamenti Májilisiniń baspasóz qyzmetinen habarlandy.
Dóńgelek ústeldi «Qazaqstan Ardagerleri» Qaýymdastyǵy tóraǵasynyń orynbasary Sáken Mahanbetov júrgizip, Parlament Májilisiniń depýtattary, aýǵan soǵysynyń ardagerleri Baqytjan Ertaev pen Bahytbek Smaǵul betashar sózben bastady.
Qazaqstan Respýblıkasynyń Aýǵan soǵysy ardagerleri uıymdarynyń «Qazaqstan ardagerleri» Qaýymdastyǵy, Qazaqstan Respýblıkasynyń Tuńǵysh Prezıdenti, Ult Kóshbasshysy, Qaýymdastyqtyń Qurmetti Tóraǵasy Nursultan Ábishuly Nazarbaevtyń tapsyrmasyn oryndaı otyryp, memleketimizdiń qalyptasýy, damýy jáne gúldenýine ózderiniń belsendi úlesin qosýda.
Prezıdenttiń Qazaqstan halqyna «Qazaqstan-2050» Strategııasy» Joldaýyn basshylyqqa ala otyryp, Ardagerler Qaýymdastyǵy qazirgi jáne bolashaqtaǵy Otan qorǵaýshylardyń boıyna patrıottyq rýh, maqtanysh sezim jáne eldiń tarıhy men dástúrlerin qurmetteýdi sińirýge baǵyttalǵan jobalardy iske asyryp keledi. Jastardy memlekettik rámizder men melekettik tilge degen súıispenshilikke sanaly túrde tárbıeleı otyryp, Memlekettik sana qalyptastyrýda búgingi tańda olar úshin tálim-tárbıege baǵyt-baǵdar bola alady.
Jaýynger-ınternatsıonalısterdiń óskeleń urpaqty tárbıeleý isine qosqan úlken úlesterin eskere otyryp, jáne Qazaqstandyq Patrıotızm Tujyrymdamasyn pysyqtaý úshin, QR Parlament Májilisiniń depýtattary, Aýǵanstan soǵysy Ardagerleri uıymynyń oblystyq tóraǵalarynyń QR Parlament Májilisiniń ǵımaratyndaǵy tuńǵysh basqosýyna Parlament Májilisiniń depýtattary, salalyq mınıstrlikterdiń ókilderi qatysty.
Dóńgelek ústelde Bilim jáne ǵylym mınıstriniń orynbasary Murat Ábenov, Aýǵanstan soǵysy Ardagerleriniń Astana bólimshesiniń tóraǵasy Qaırat Erýbaev, Almaty bólimshesiniń tóraǵasy Murat Ábdishýaqov, Qaraǵandy bólimshesiniń tóraǵasy Amangeldi Jantasovtar sóz alyp, óz oı-pikirlerin ortaǵa saldy. Jastardy patrıottyq rýhta tárbıeleýdiń mańyzyna toqtalyp, naqty tarıhı tálimder men naqty tulǵalar erlikteriniń úlgisinde júrgizýdi usyndy.
