Elordada aýdıtor fılarmonııa basshylarynan 15 myń dollar para aldy dep aıyptalýda

NUR-SULTAN. QazAqparat – Nur-Sultandyq aýdıtor Memlekettik akademııalyq fılarmonııanyń laýazymdy tulǵalarynan 15 myń AQSh dollary kóleminde para aldy degen kúdikke ilindi, dep habarlaıdy QazAqparat.

Bul týraly QR Sybaılas jemqorlyqqa qarsy is-qımyl agenttigi 1-shi departamentiniń asa mańyzdy ister jónindegi tergeýshisi Danııar Bıǵaıdarov aıtyp berdi.

«Nur-Sultan qalasynyń Sybaılas jemqorlyqqa qarsy qyzmeti Nur-Sultan qalalyq Іshki memlekettik aýdıt departamenti aýdıtorynyń aýdıtorlyq tekserý boıynsha oń esep jasaý úshin qala ákimdiginiń Memlekettik akademııalyq fılarmonııasynyń laýazymdy tulǵalarynan 15 myń AQSh dollary kóleminde para alý faktisi boıynsha sotqa deıingi tergeý júrgizýde. Kúdiktiniń kinásine qatysty túpkilikti sheshimdi sot shyǵarady», - dedi D. Bıgaıdarov Facebook paraqshasynda ótken onlaın brıfıngte.

Tergeý múddesi úshin ózge aqparat jarııalaýǵa jatpaıdy.