Elordada aýanyń lastanýyna qandaı faktor áser etedi
NUR-SULTAN. QazAqparat – Elordada jeldiń tarmaqtaryna záýlim ǵımarattar áser etip jatyr. Bul týraly Nur-Sultan qalasynda aýa sapasyna arnalǵan konferentsııada Tájirıbeshil ekologtar qaýymdastyǵynyń tóraıymy Laýra Malıkova aıtty, dep habarlaıdy QazAqparat tilshisi.
«Ortalyq Azııadaǵy aýa sapasyna monıtorıng» atty konferentsııa barysyndaǵy baspasóz máslıhatynda elordadaǵy aýanyń tazalyǵy boıynsha jel baǵyttary men tarmaqtarynyń ózgerýine qandaı faktorlar áser etetini, osy oraıda qalanyń mańyndaǵy «jasyl beldeý» men qala qurylysynyń yqpaly suraldy.
«Qalada josparsyz záýlim úılerdi salý jeldiń baǵytyna, jeldiń jyldamdyǵyna áser etedi. Qalanyń ishinde kóptegen záýlim ǵımarattar salynyp jatyr, bul turǵyda jel tarmaqtary máselesi eskerilmeıdi. Ekinshiden, «jasyl beldeýge» toqtalsaq, naqty osyǵan qatysty ǵylymı zertteýler júrgizilmedi. Biraq, kezinde «jasyl beldeý» elordany qatty daýyldardan qorǵaý maqsatynda otyrǵyzylǵan edi. Sondyqtan onyń áseri bar, biraq qanshalyq ekenin aıtý úshin ǵylymı zertteýler júrgizý kerek», - dedi L. Malıkova.
Bul rette ol aýanyń tazarýyna tek jel ǵana áser etpeıtinin, osy salada lastaý kózderin azaıtýǵa mán berý kerek ekenin atap ótti.
«Kómirden gaz jaǵýǵa kóshsek, jylý berý maýsymynda zııandy zattar azaıady. Sol arqyly Qazaqstannyń ortalyq, soltústik jáne shyǵys bóliginde jáne Almaty qalasynda aýanyń sapasyn áldeqaıda jaqsartýǵa múmkin bolady», - dedi qaýymdastyq tóraıymy.
Onyń aıtýynsha, elordanyń ishinde aýdandardyń ishinde Ońtústik-Shyǵys bóliginde aýa jıi lastanady.
«Bıyl jazda osy baǵytta gazǵa qosylý jumystary júrgizildi jáne áli de jalǵasyp jatyr. Bıylǵy jylytý maýsymynda aýa sapasyn osy jerden qaraımyz. Ol jerde keıbiri áli de gazǵa qosylmaǵan syńaıly», - dedi Laýra Malıkova.
