Elordada aýa raıyna baılanysty eskertý jarııalandy

Nur-Sultan qalasynyń tótenshe jaǵdaılar departamenti saqtyq sharalaryn elorda turǵyndary men qonaqtarynyń esine salady. Atap aıtqanda, qulaý yqtımaldyǵyn azaıtý úshin kóktaıǵaq kezinde mynadaı erejelerdi ustanýǵa shaqyrady:

- bıik óksheli aıaq kıimnen bas tartyp, tabany syrǵanamaıtyn aıaq kıimdi tańdańyz;

- joldyń júrý bóliginde óte saq bolyńyz, asyqpańyz jáne júgirmeńiz;

- kólbeý jerlerdi aınalyp ótýge tyrysyńyz;

- qolyńyz múmkindiginshe bos bolýy kerek, aýyr sómke kótermeýge tyrysyńyz, qolyńyzdy qaltańyzǵa salmańyz - bul qulaý múmkindigin arttyrady;

- qart adamdarǵa rezeńke ushy bar nemese arnaıy ushty taıaq qoldanýǵa keńes beremiz;

- aıaq astyńyzǵa qarap, qaýipti jerlerdi aınalyp ótýge tyrysyńyz.

«Esińizde bolsyn, ásirese, arqamen shalqalap qulaý qaýipti, sebebi bas jerge soǵylyp, mı shaıqalýy múmkin. Jaraqat alǵan jaǵdaıda mindetti túrde dárigerdiń kómegine júginińiz» delingen habarlamada.

Tuman kezinde:

- júrgizýshiler kólikti kúrt tejeýden aýlaq bolýy kerek. Eger de jolǵa shyǵýǵa týra kelse, tuman aımaǵynda jyldamdyqty aıtarlyqtaı tómendetý qajet, al eger joldaǵy kóriný eki metrden aspaıtyn bolsa, qozǵalysty toqtatý usynylady. Sondaı-aq mindetti túrde gabarıttik jaryqty qosý jáne túrli manevrler, atap aıtqanda basyp ozýlardan aýlaq bolý;

- jaıaý júrginshilerge joldy belgilengen jaıaý júrginshiler ótetin jerlerde ǵana ótý usynylady;

- saq bolý, aýa raıynyń ózgerýi jáne engizilgen shekteýler týraly aqparatty qadaǵalaý;

- qurylys obektilerine qolaısyz aýa raıy jaǵdaıy áserinen aýmaqtardy jáne turǵyndardy qorǵaý, qurylys alańdarynda múmkindiginshe qurylys-montaj jumystaryn júrgizýdi shekteý boıynsha qosymsha sharalardy qabyldaý qajet.

«Tótenshe jaǵdaı týyndaǵan jaǵdaıda «112» nómirine qońyraý shalyńyz» deıdi TJD baspasóz qyzmeti.