Elordada aty ańyzǵa aınalǵan «Qara maıor» týraly fılm kórsetildi

NUR-SULTAN. QazAqparat - Búgin elordadaǵy QR Qarýly kúshteriniń áskerı tarıhı mýzeıinde aýǵan soǵysynyń aty ańyzǵa aınalǵan ardageri Borıs Kerimbaev týraly túsirilgen derekti fılmniń kórsetilimi ótti, dep habarlaıdy QazAqparat tilshisi.

«QR Tuńǵysh Prezıdenti - Elbasy Nursultan Nazarbaev óziniń «Uly dalanyń jeti qyry» atty baǵdarlamalyq maqalasynda: «Halyqtyń tarıhı tanym-túısiginde kıno óneri erekshe oryn alady. Bizdiń dańqty batyrlarymyz tek qana Qazaqstanda ǵana emes, sonymen qatar búkil álem boıynsha eliktegi laıyq tulǵalar», dep atap ótti. Qazaqstandyq kınematografısterdiń polkovnık Borıs Tókenuly Kerimbaevqa arnalǵan búgingi jobasy osy baǵytta jańalyq bolýy tıis», - dedi fılm kórsetilimi aldynda sóz sóılegen QR Qorǵanys mınıstri Nurlan Ermekbaev.

Sonymen qatar, ol derekti fılmdi túsirýge atsalysqan rejısserlerge, stsenarııshilerge, prodıýserlerge rızashylyǵyn bildirip, Borıs Tókenuly jaıly tyń málimetter bergen onyń týǵan-týystaryna, jora-joldastaryna rahmet aıtty.

Fılmdi QR Mádenıet jáne sport mınıstri Arystanbek Muhamedıuly, Májilis depýtattary, qoǵam qaıratkerleri tamashalady.

Aýǵan soǵysynyń ardageri, arnaıy maqsattaǵy 177-shi jasaq komandıri Borıs Kerimbaevtyń taǵdyry jaıynda syr shertetin fılmdi QR Mádenıet jáne sport mınıstrliginiń tapsyrysymen «Qazaqfılm» kıno stýdııasy túsirgen. Stsenarıı avtorlary men rejısserleri: Áset Ernazarov pen Ǵazız Nazarov.