Elordada «Atletıko» jartylaı negizgi qurammen oınaýy múmkin
ASTANA. QazAqparat - Mundo Deportivo tilshisi Haver Gomardyń paıymynsha, ÝEFA chempıondar lıgasynyń búgingi Qazaqstanda ótetin oıyny «Atletıko» úshin zor mańyzǵa ıe bolǵanyna qaramastan Dıego Sımeone sońǵy oıynmen salystyrǵanda óz komandasyna birqatar ózgerister engizýi múmkin. Ushyp kelý uzaqtyǵyn, aldaǵy kezdesý ótetin jasandy tósenishti, sonymen qatar jeksenbi kúni «matrasshylardyń» Hıhon qalasynyń «Sportıng» komandasymen kezdesetindigin eskergeni jón, Sports.kz.
Ispandyq tilshiniń jazýynsha, El Cholo (Dıego Sımeoneniń laqap aty, «Úndis» dep aýdarýǵa bolady) jeksenbi kúni astanaǵa attanara aldynda bastapqy quramda jasyl alańǵa shyǵatyn 11 oıynshyny anyqtaǵan joq. Onyń boljamynsha, agrentınalyq maman «Astana» komandasymen ótetin oıynnyń alǵashqy sátterinde óner kórsetetin fýtbolshylar tizimine keminde 2 nemese 3 ózgertý engizýi múmkin. ıAǵnı, Qazaqstan chempıonymen kezdesetin bastapqy quramda Saýl Nıges, Olıver Torres pen Fernando Torres bolýy yqtımal.
Saýl ózine alańǵa shyǵýǵa múmkindik beriletin oıynnyń ekinshi kezeńinde jaqsy qyrynan kózge túsip júr. Sondyqtan Sımeone 90 mınýt jasyl alańda júretin ortalyq oıynshylardyń biri Gabı ne bolmasa Tıagý Mendeshke demalýǵa múmkindik beretin shyǵar. Olıver Torres búginde komandanyń úzdik oıynshysyna aınalǵan Karraskoǵa óz ornyn berip qoıǵan. Biraq, búgin bul fýtbolshyǵa ózin tanytýǵa múmkindik týyndaıtyn sııaqty.
Al «Atletıko» úshin óziniń 100-shi golyn soǵýdy jan-tánimen qalaıtyn Fernando Torrestiń negizgi quramda jasyl alańda oıqastaýǵa múmkindigi bar. Bul úsh oıynshydan bólek, komanda bapkeri alǵashqy mınýttarda Stefan Savıchti nemese Gılerme Sıkeırany oıynǵa qosýy múmkin.
