Elordada ataýly kómek alýǵa ótinish onlaın qabyldana bastady
NUR-SULTAN. QazAqparat – Elordada 2021 jyldyń ІІ toqsanyna ataýly áleýmettik kómek alý úshin ótinishter qabyldaý bastaldy, dep habarlaıdy QazAqparat qala ákimdigine silteme jasap.
Qaýipti ınfektsııanyń taralýyna jol bermeý maqsatynda ótinish berýshimen tikeleı baılanysty boldyrmaý jáne toptalyp jınalmaý úshin qujattar elektrondy úkimet portaly arqyly onlaın túrde qabyldanady. Ótinish berýshi qujattardy egov.kz elektrondy úkimet portaly arqyly onlaın túrde tapsyrady. Osy maqsatta Jumyspen qamtý ortalyǵynyń tórt aýdany (Almaty, Saryarqa, Esil, Baıqońyr) mamandary Zoom platformasynda qujattardy tapsyrý barysyn túsindirip, vıdeonusqaýlyq usynyp otyr.
Vıdeonusqaýlyqty myna siltemeden kórýge bolady.
Qujattardy qabyldaý 1-30 sáýir aralyǵynda júrgiziledi. Qazirgi ýaqytta Nur-Sultan qalasy boıynsha 3 700-den astam otbasyǵa AÁK taǵaıyndaldy.
Aıta keteıik, ataýly áleýmettik kómek — tabysy eń tómengi kúnkóris deńgeıiniń 70%-ynan tómen árbir otbasy múshesine toqsan saıyn taǵaıyndalatyn aqshalaı tólem.
