Elordada «Ata Zańym – aıbarym» atty merekelik kontsert ótti

NUR-SULTAN. QazAqparat - Erkeǵalı Rahmadıev atyndaǵy Memlekettik akademııalyq fılarmonııanyń ártisteri elorda turǵyndary men qonaqtaryna arnap «Ata zańym – aıbarym» atty merekelik kontsert daıyndady, dep habarlaıdy QazAqparat qala ákimdiginiń resmı saıtyna silteme jasap.

Jınalǵan kórermender aldynda Qazaqstannyń eńbek sińirgen qaıratkerleri, «Daryn» memlekettik jastar syılyǵynyń laýreattary, halyqaralyq jáne respýblıkalyq konkýrstardyń jeńimpazdary sóz sóıledi.

«Búgingi mereke-árbir qazaqstandyq úshin óte mańyzdy jáne mártebeli kún. Bizdiń Konstıtýtsııa-qazaq halqynyń tarıhı jeńisin, armandary men múddelerin zańdy túrde bekitken, búkil álemge Qazaqstan dep atalatyn erkin eldiń ómir súrýin ashqan bedeldi qujat. Elorda turǵyndary men qonaqtaryna tamasha shyǵarmashylyq kesh syılaı alǵanymyz úshin qýanyshtymyz. Bizdiń Konstıtýtsııamyzǵa baǵynyp, shyndyqty aıta alatyn urpaq óssin», - dedi Qazaqstannyń eńbek sińirgen qaıratkeri Svetlana Aıtbaeva.

Sahnada Qazaqstanda dúnıege kelgen úzdik shyǵarmalar oryndaldy. Olardyń qatarynda Evgenıı Brýsılovskııdiń «Shashý», Nurǵısa Tilendıevtiń «Alataý», Altynbek Qorazbaevtyń «Qazaqstan» jáne t.b. bar.

«Kontsert óte unady, uıymdastyrý joǵary deńgeıde. Halyq ánderi men nostalgııa úshin rahmet! Barshańyzdy Konstıtýtsııa kúnimen quttyqtaımyn, barshańyzǵa densaýlyq, baqyt jáne jumysta tabys tileımin», - dedi elorda turǵyny Lázzat Erjanova.

Ártisterdiń jarqyn jáne áserli qoıylymdary eshkimdi beı-jaı qaldyrmady. Al árbir nomer dý qol shapalaqpen súıemeldendi.

Foto : gov.kz