Elordada at sportynan ashyq birinshilik ótip jatyr

ASTANA. QazAqparat – Elordada Respýblıka kúni qarsańynda at sportynyń túri – konkýrdan ashyq birinshilik ótip jatyr. Oǵan, bas shahardan bólek, Qaraǵandy jáne Almaty qalarynan kelgen 50-ge jýyq shabandoz qatysty, dep habarlaıdy QazAqparat tilshisi.

Jarys Astana irgesindegi «Etnoaýyl» ulttyq-mádenı kesheninde ótip jatyr. Atalǵan saıysta shabandozdar belgilengen tártippen, kúrdeli ári bıik kedergilerdi eńserýi kerek.

«Saıystyń alǵashqy kúni, ıaǵnı birinshiliktiń irikteý kezeńine 50-ge jýyq shabandoz qatysty. Olımpıadalyq tártipte shabandozdar úsh túrli sanatta baq synaıdy. Olar – «Ashyq synyp sanaty», «Jas jylqylar sanaty» jáne «Balalar sanaty». Birinshi sanat boıynsha jarysqa 12 jastan 15 jasqa deıingi balalar, al ekinshi jáne úshinshi sanat boıynsha 16 jastan asqan shabandozdar qatysady.

Konkýr – at sportynyń ishindegi eń áserlisi, qyzyǵy jáne beınelisi. Bul jarysta sportshy men jylqynyń ártúrli jaǵdaıda kezdesken kedergilerden arnaıy baǵyt boıynsha júrip ótken joly esepke alynady. Tóreshiler joldyń jyldamdyǵy men tazalyǵyna mán beredi. Árbir qulaǵan kedergi úshin aıyppul sekýndtary bar», - dedi at sportynyń olımpıadalyq túrlerinen memlekettik jattyqtyrýshy Amanjol Hasenov.

Sportshylardyń aıtýynsha, konkýr – Olımpıada oıyndary men halyqaralyq jarystardyń arasynda jankúıerleri kóp saıys túri.

«At sportymen úsh jyldan asa aınalysyp kelemin. Qaraǵandy qalasynan kelip turymyn. Búgin men 120 sm bıiktiktegi kedergilerdi eńserý boıynsha jarys jolyna shyǵamyn. Qatysýshylar óte kóp. Arasynda eń myqtylary da bar», - dep toqtaldy jarysqa qatysýshy Nıka Sım.

Aıta keteıik, jarystyń fınaly 25 qazan kúni, ıaǵnı erteń ótedi. Saıystyń jalpy júlde qory – shamamen 7 mıllıon teńge.