Elordada 6 elden kelgen 60 shabandoz konkýrdan synǵa tústi
ASTANA. KAZINFORM – Búgin Astanada at sporty túrlerinen halyqaralyq básekeler bastaldy. Sportshylar konkýrdan Eýrazııalyq lıga Kýbogynyń kezeńi jáne atpen mánerlep júrý saıysynan halyqaralyq týrnırde baq synap jatyr. «Arǵymaq» at sporty kesheninde ótip jatqan jarysqa 6 elden kelgen shabandozdar qatysady, dep habarlaıdy Kazinform agenttiginiń tilshisi.
– Bul jarys halyqaralyq deńgeıde jyl saıyn uıymdastyrylyp turady. Biraq dál osy báseke bizde ártúrli jaǵdaılarǵa sáıkes biraz jyl boıy ótpegen. Mysaly, Ózbekstan, Qyrǵyzstan, Iran, Ázirbaıjan memleketteri únemi ótkizip turady. Biz de osy qatardan qalmaı, óz deńgeıimizdi kóterip jatyrmyz. Qazir Astanada ótip jatqan saıys úlken ekpin beredi dep oılaımyz, - deıdi QR at sporty federatsııasynyń prezıdenti Rýstam Baıalıev Kazinform tilshisine bergen suhbatynda.
Halyqaralyq dodaǵa Armenııa, Grýzııa, Iran, Qyrǵyzstan, Ózbekstan jáne Qazaqstan memleketteriniń 60-tan astam sportshylary qatysyp, kúsh, dáldik, úılesim jáne jyldamdyqty talap etetin jarys túrlerinen óz sheberlikterin kórsetýde. Alǵashqy jarys kúni shabandozdar 125–140 sm kedergilerden ótý jáne mánerlep júrý saıystarynan ózara synǵa tústi.
Jarys nátıjesi boıynsha konkýrdan 125 sm kedergilerden ótý básekesinde qyrǵyzstandyq Andreı Trıapıtsın úzdik atandy. 2-oryn ózbekstandyq shabandoz Hýrshıdbek Alımdjanovqa buıyrdy. Al qazaqstandyq Daıana Onaeva 3-oryndy qanjyǵasyna baılady. Al dál osy bıiktikte ótken Maxima Masters Eurasia shaǵyn kýbogynda Qazaqstan sportshysy Bekjan Baıjanuly 1-oryn ıelendi. Alǵashqy básekede 1-oryn alǵan Andreı Trıapıtsın bul joly 2-orynǵa jaıǵasty. Al Ózbekstannan kelgen Hýrshıdbek Alımdjanov jarysty úshinshi bolyp aıaqtady.
– Bul jarys alda bolatyn álem chempıonatyna irikteý. Men Champion League laqapymen tanymal atpen dodaǵa qatysamyn. Jarys óte qyzyqty ótýde. Daıyndyq óte joǵary. Astana qalasyna alǵash kelýim. Munda shabandoz úshin de, at úshin de óte jaqsy jaǵdaı jasalǵan, - deıdi ózbekstandyq shabandoz Hýrshıdbek Alımdjanov.
Hýrshıdbek Alımdjanov Eýrazııa lıgasy Álem kýbogynda 140 sm kedergiden ótý básekesinde de júldeli boldy. Ol bul joly úzdik nátıje kórsetti. Ekinshi jáne úshinshi oryndy Hýrshıdbek Alımdjanovtyń jerlesteri Akbar Sharıpov pen Bekzod Kýrbanov ózara bólisip aldy. Ózbekstannan kelgen komandanyń quramynda Ózbekstan at sporty federatsııasynyń prezıdenti Bahromdjon Gazıev te bar.
Al Qazaqstan quramasynyń sportshylary bul jarysqa joǵary daıyndyqpen kelgenderin aıtady. Jarys qatysýshylarynyń ishinde bıyl Qyrǵyzstan men Ózbekstanda ótken Álem kýbogynyń kezeńderinde júldeli oryndarǵa ıe bolǵan Ksenııa Batalova, Núrıla Turysbekova, Daıana Onaeva jáne Oleg Sokolenko bar. Al mánerlep júrýden jaqynda ǵana Qyrǵyzstanda ótken halyqaralyq týrnırde komandalyq esepte kúmis júldeni jeńip alǵan Darıa Popova, Karına Jarylǵapova men Roza Dáýrenbekter baq synaıdy.
– At sporty túrlerinen Qazaqstan quramasynyń daıyndyǵy jaqsy. Buǵan deıin qatysýshylarymyz 2 apta jattyǵý jıynyn ótkizdi. Sportshylardyń deńgeıi jaqsy. Osy jarystan da júldeli bolamyz dep úmittenip otyrmyz, - deıdi at sportynan QR qurama komandasynyń bas bapkeri Áset Tolqynbekov.
Aıta keteıik, elimizde ótip jatqan halyqaralyq jarystardyń jalpy júlde qory – 24 000 AQSh dollary.
Esterińizde bolsa, at sportynan qazaqstandyq sportshylar Tashkentte ótken iri týrnırlerde sátti óner kórsetken edi.