Elordada asyq atýdan jarys ótti
ASTANA. QazAqparat - Búgin Astanada QR Mádenıet jáne sport mınıstrligi qyzmetkerleri arasynda Asyq atý ulttyq sporttyq oıynynan jarys ótti, dep habarlaıdy QazAqparat tilshisi.
Jarysqa mınıstrlik quramyna kiretin komıtetter men departamentterdiń komandalary qatysty.
Sport salasynyń qyzmetkerleri arasynda ótken saıys óte tartysty ótti. Sport komıtetiniń eki komandasy 2 oıynda teń túsip, tek 3-shi oıynda ǵana bir asyq aıyrmasymen shyn myqty anyqtaldy.
Bas sarapshy Muxamedjan Beknazarov pen basqarma basshysy Ermek Jýsanov jeńiske jetip birinshi oryndy ıelendi. Al ekinshi oryndy Mınıstrdiń orynbasary Sáken Musaıbekov pen komıtet tóraǵasynyń orynbasary Asqar Esimovterdiń komandasy ıelendi, úshinshi oryndy Tilderdi damytý komıtetiniń komandasy enshiledi.
Aıta keter jaıt, aldaǵy ýaqytta mınıstrlik basshylyǵy ujym arasynda sporttyń taǵy da birneshe túrinen turaqty jarystardy uıymdastyrýdy qolǵa almaqshy.
Mundaǵy basty maqsat - ulttyq qundylyqtardy dáripteý. Al asyq atý - kóne zamannan kele jatqan qazaq xalqynyń tól dástúrimen ushtasqan, qazaq balasynyń qanyna bitken ulttyq oıyny.
