Elordada «Astanalyq eńbek naryǵy» gazeti shyǵarylmaq

ASTANA. 6 naýryz. QazAqparat - Osy aıda Astanada jumysqa ornalastyrý máselelerine arnalǵan alǵashqy «Astanalyq eńbek naryǵy» qalalyq gazeti shyǵaryla bastaıdy.

Bul týraly elordanyń resmı saıtynda habarlandy.

«Basylym aıyna bir ret memlekettik jáne orys tilderinde 3000 danamen shyǵarylatyn bolady. Jańa gazet betterinde elordanyń eńbek naryǵy keńeıýiniń ózekti máseleleri, onyń keleshegi men damýy, kadrlardyń biliktiligin arttyrý men qaıta daıarlaý múmkindikteri jáne basqa da jaılar kórinis tabady», - dedi Jumyspen qamtý jáne áleýmettik baǵdarlamalar basqarmasynyń bastyǵy Alma Altybaeva qalalyq máslıhatta ótken dóńgelek ústelde.

Basqarma bastyǵynyń túsindirýinshe, «Astanalyq eńbek naryǵy» gazeti Internetti paıdalaný múmkindigi joqtarǵa (jumyssyz jáne ózin-ózi jumyspen qamtyǵan azamattar) óte paıdaly bolmaq. Osy únparaqtyń kómegimen qala turǵyndary Halyqty jumyspen qamtý oralyǵynyń jáne jumyspen qamtý týraly arnaıy baǵdarlamanyń bar ekendigin bile alady. «Astanalyq eńbek naryǵy» basylymy halyq kóp júretin jerlerde tegin taratylatyn bolady.