Elordada «AstanaLeisure 2010 - «Demalys-Astana» VII halyqaralyq týrıstik kórmesi ashylady

Bul týraly búgin Týrızm jáne sport mınıstrliginde ótken baspasóz máslıhatynda «ITECA» kompanııasynyń AstanaLeisure jobasynyń menedjeri Alena Gerasımova málim etti.

«AstanaLeisure kórmesi halyqaralyq Týrızm kúni jáne 2011 jyly Astana men Almatyda ótetin 7-shi qysqy Azııa oıyndarynyń qurmetine arnalyp ótkizilip otyr», deıdi A. Gerasımova.

«Atalmysh kórmeniń bıylǵy jyldaǵy basty mindeti - Qazaqstannyń Qysqy Azııa oıyndary barysynda shetel azamattaryn qabyldaýǵa daıyndalyp jatqan el retinde onyń beınesin, týrıstik áleýetin pash etý», dep atap kórsetti ol.

Kórmeniń ortalyq stendi bolyp Qazaqstannyń Týrızm jáne sport mınıstrliginiń stendi sanalmaq. Onda Azıada - 2011 sharasy tolyq kólemde nasıhattalady. Ulttyq týrıstik áleýet oblystyq jáne Astana men Almaty qalalarynyń basqarmalarynyń stendteri arqyly da usynylatyn bolady.

Bul respýblıkanyń barlyq óńirindegi, taıaý jáne alys shetelderdegi týrıstik ındýstrııa kompanııalarynyń basyn qosatyn iri kásibı týrıstik oqıǵa ekendigin nazarǵa alǵan A. Gerasımova, bıylǵy kórmege jergilikti jáne halyqaralyq baǵyttarda qyzmetter usynatyn Qazaqstan, Brazılııa, Malaızııa, Túrkııa, Qytaı, Soltústik Afrıka, Taıland, Ýkraına, Chehııa men Shveıtsarııa elderinen 50-den astam kompanııa kelip qatysqaly otyrǵandyǵyn habarlady.

«Kórmede qysqy maýsym demalysy ashylǵandyqtan Malaızııa, Taıland elderiniń, sonymen qatar Túrkııanyń ulttyq stendteri, birneshe jyl úzilisten keıin bizge Ýkraınanyń stendi qaıta oraldy», deıdi A. Gerasımova.

Sondaı-aq uttyq stendterden bólek, onda sońǵy týrıstik ónimder, áýe kompanııalarynyń arnaıy usynystary jáne týrıstik naryqtaǵy memlekettik qurylymdardyń qyzmetteri tanystyrylady.

Kórme aıasynda qazaqstandyq týrıstik uıymdar ózderiniń sheteldik áriptesterimen iskerlik kelisimder jasaýǵa qol jetkizetin bolady.