Elordada «Astana» veloklýbynyń «Týr de Frans» kópkúndigindegi jeńisine arnalǵan velosherý ótti
ASTANA. Shildeniń 31-i. QazAqparat /Jasulan Amanbaıuly/ - Búgin, senbi kúni «Astana» veloklýbynyń «Týr de Frans» kópkúndigindegi jeńisine oraı, buqaralyq velosherý ótti, dep habarlaıdy QazAqparat.
Uıymdastyrýshylardyń aıtýynsha, sharanyń maqsaty «Astana» veloklýbynyń «Týr de Frans» kópkúndigindegi jeńisine jáne Qazaqstanda velosport túrin damytýǵa baǵyttalǵan. Sharaǵa sport mektepteriniń tálimgerleri, sondaı-aq qala turǵyndary, qonaqtary qatysty. Velosherýge qatysýshylar qalanyń Táýelsizdik alańynan bastalǵan velosherý Saraıshyq, Turan, Syǵanaq kóshelerimen jalpy uzyndyǵy 10 shaqyrym joldy júrip ótti.
«Jaqynda ǵana «Týr de Frans» kópkúndiginde bizdiń elordamyzdyń atymen atalǵan «Astana» velokomandasy kezekti ret óziniń álemdegi myqtylyǵn dáleldedi. Tamasha qalamyzdyń atyn jahanǵa áıgiletti. Biz búgin «Astana komandasyn, sonymen qatar velosportty jáne jalpy buqaralyq sportty qoldaý úshin jınaldyq», deıdi Astana qalasy ákiminiń orynbasary Erlan Qojaǵapanov.
Іs-shara sońynda velosherýde kózge túsken jasóspirimder birneshe atalymdar boıynsha marapattalyp, qala turǵyndaryna arnalǵan kontserttik baǵdarlamamen ulasty.
