Elordada «Astana - teń múmkindikter qalasy» kórme-festıvali ótip jatyr
ASTANA. QazAqparat - Búgin Astanada «Otan qorǵaýshylar» monýmentiniń aldyndaǵy alańda «Astana - teń múmkindikter qalasy» kórme-festıvali ótkizilýde. Bul týraly elorda ákimdiginiń resmı saıtynda habarlanǵan.
Sharaǵa 34 tehnıkalyq jáne kásibı kolledj oqýshylary qatysýda. Negizinen ol jalpy bilim beretin mektepterdiń 9-shy jáne 11-shi synyptarynyń túlekterine jáne jumys berýshilerge arnalǵan. Festıval barysynda kontserttik baǵdarlama, kórme jáne sheberlik synyby ótkiziledi. «Ánim saǵan arnalady, Astanam!» kontserti aıasynda kolledjderdiń kóńildiler men tapqyrlar klýbynyń jeńimpazdary jáne júldegerleri óner kórsetedi, al basqarý kolledjiniń modelderi kópshilik nazaryna defıle usynady. Sonymen qatar munda kelýshiler bı óneri men fleshmobty tamashalaıdy. Ekinshi bólimdegi kópqyrly kórmede tehnıkalyq jáne kásibı oqytý oryndarynyń stýdentteri jınaǵan robotehnıkanyń 5 túri, bodı-art, kórkemdik jumystary, shash órý sheberligi jáne t.b. usynylady. Sheberlik synyby aıasynda stýdentter túrli taǵamdar ázirlep, shashtaraz óneri, dánekerleý jumysy t.b biliktilikterin kópshilikke pash etpek. Uıymdastyrýshylardyń aıtýynsha, festıval naryqta suranysqa ıe tehnıkalyq mamandyqtar reıtıngin kóterýge septigin tıgizedi. Ol bolashaq mamandyǵyn tańdap úlgermegen oqýshylarǵa baǵyttalǵan. Aıta keteıik, saǵat 15.00-de bastaǵan shara keshki saǵat 18.00-ge deıin sozylmaq.
