Elordada Astana men Qaraǵandy komandalary arasynda ınklıýzıvti fýtboldan joldastyq match ótti
ASTANA. KAZINFORM - 2025 jylǵy 8 shildede Astana men Qaraǵandydan kelgen erekshe bilim berý qajettilikteri bar jasóspirimder arasyndaǵy joldastyq match ótti.
Sporttyq is-shara Qazaqstandaǵy aýtızm, Daýn sındromy jáne basqa da psıhıkalyq erekshelikteri bar balalar men jasóspirimderge arnalǵan alǵashqy ınklıýzıvti fýtbol lıgasy — UNI Football League jobasy aıasynda uıymdastyryldy.
Bul biregeı áleýmettik jobany iske asyrý úshin «Bolashak Charity» qoǵamdyq qory, Qazaqstan fýtbol federatsııasy jáne «Freedom Shapaǵat» korporatıvtik qory kúsh biriktirdi. Jobanyń maqsaty — erekshe qajettilikteri bar balalardy qoldaý, ınklıýzıvti sportty damytý jáne fýtbol arqyly ózara kómektesý men meıirimdilik qundylyqtaryn qalyptastyrý.
UNI Football League jobasy 2023 jyly Astana qalasynda Qysqy qaıyrymdylyq balynyń qarajatyna bastalǵan bolatyn. Búgingi tańda Freedom Holding Corp. kompanııasynyń qoldaýymen jáne Freedom Shapaǵat korporatıvtik qory arqyly bul Lıgaǵa Qazaqstannyń 9 qalasynan 115 bala qatysty. Olar: Astana, Shymkent, Atyraý, Aqtóbe, Semeı, Qaraǵandy, Petropavl, Taraz jáne Óskemen qalalary.
Barlyq qatysýshylar sporttyq kıimmen, qural-jabdyqtarmen qamtamasyz etilgen jáne balalarmen jumys isteý boıynsha arnaıy daıyndyqtan ótken bilikti jattyqtyrýshylardyń basshylyǵymen jattyǵady. Ár qalada jattyqtyrýshylardyń UEFA-nyń B, C jáne D sanatyndaǵy lıtsenzııalary bar mamandary jumys isteıdi.
Jobanyń maqsaty – erekshe balalarǵa turaqty dene belsendiligine qol jetkizýge múmkindik berý jáne olardyń áleýmettenýine qaýipsiz ári qoldaýshy orta qurý.
Osyǵan deıin jastar arasyndaǵy Azııa chempıonatynda qazaqstandyq aýyr atletter taǵy eki medal alǵany týraly jazdyq.