Elordada «Astana keshteri» halyqaralyq óner festıvali ótedi
NUR-SULTAN. QazAqparat - Maýsymnyń 3-7 kúnderi elimizdiń bas qalasynda «Astana keshteri» atty VIII halyqaralyq óner festıvali bastalady, dep habarlaıdy QazAqparat tilshisi.
«Bastaýyn 2012 jyly alǵan óner festıvaliniń basty maqsaty - halyqtyń túrli áleýmettik toptaryna álemdik ónerdiń jaýharlaryn tamashalaýǵa múmkindik berý. Bul kúnderi álemniń úzdik sahnalaryn baǵyndyrǵan tanymal óner juldyzdary klassıka, halyq óneri jáne estrada baǵytyndaǵy mýzykanyń ozyq úlgilerin qalyń kópshilikke tartý etpek», - dedi «Qazaqkontsert» memlekettik kontsertter uıymynyń dırektory Jeńis Seıdýllauly OKQ-de ótken baspasóz máslıhatynda.
Bıylǵy festıvalǵa Italııa, Frantsııa, Reseı, AQSh, Ózbekstan elderiniń belgili mýzykanttary qatysady. Atap aıtqanda, ıtalııalyq altıst Anna Serova, fortepıano dýeti Marko Skıavo men Serdjo Markedjanı, Ózbek memlekettik úlken teatrynyń solısi Ramız Ýsmanov, Parıjdegi Áýlıe Nıkolıa dıý Shardone shirkeýiniń organısi Marı-Anes Gral-Mene jáne AQSh-tan kelgen Ózbekstannyń týmasy tanymal pıanıst Bekzoda Abdýraımova óz ónerlerin ortaǵa salady.
«Bul keshte álem moıyndaǵan sahna juldyzdarymen birge bir sahnada elimizdiń «Solıster akademııasy», «Forte trıo» ujymy, sondaı-aq Medet Chotabaev syndy otandyq daryndy ónerpazdar óner kórsetedi. Bul biz úshin úlken dáreje ári mol tájirıbe. ıAǵnı «Astana keshteri» halyqaralyq festıvali álemdik juldyzdardyń ónerin usynyp qana qoımaı, otandyq mýzyka ónerin álemdik keńistikke tanytýǵa ıgi yqpal etedi. Biz HHІ ǵasyrdyń jahandyq kartasynda eshkimge uqsamaıtyn, derbes orny bar ult bolamyz desek, «Jahandaǵy zamanaýı qazaqstandyq mádenıet» jobasyn iske asyrýǵa tıispiz», - dedi ol.
«Astana keshteri» halyqaralyq festıvali 3-7 maýsym kúnderi elordadaǵy «Qazaqstan» OKZ, «Astana opera» kameralyq zaly, Qazaq ulttyq óner ýnıversıtetiniń organ zalynda ótedi. Festıval aıasynda ótetin kontsertterdiń orny men ýaqyty týraly aqparatty «Qazaqkontsert» MKU-nyń resmı saıty jáne áleýmettik paraqshalarynan bilýge bolady.
