Elordada «Astana Finance Days 2025: Bolashaqtyń negizin qalaıtyn kapıtal» forýmy ótedi
ASTANA. KAZINFORM - 2025 jylǵy 4-5 qyrkúıekte Astana qalasynda Astana International Forum qoldaýymen jyldyń basty qarjy oqıǵalarynyń biri – VIII Astana Finance Days (AFD) forýmy ótedi.
Bıylǵy is-sharanyń taqyryby – «Bolashaqtyń negizin qalaıtyn kapıtal». Taqyryp aǵylshyn tilindegi «capital» sóziniń qos maǵynasyn: birinshisi, Astana – Qazaqstannyń astanasy (capital) jáne Shyǵys pen Batys toǵysqan, qarqyndy damyp kele jatqan qarjy ortalyǵy, ekinshisi maǵynasy – ornyqty ósýdiń qozǵaýshy kúshi retinde kapıtaldy (capital) bildiredi.
Álemde kapıtal úshin qyzý báseke kúsheıgen búgingi zamanda qoldaǵy resýrstardy utymdy paıdalaný – klımattyń ózgerýinen bastap ekonomıkany ósirýge jáne tehnologııany ilgeriletýge deıingi syn‑qaterlerdi jeńýdiń negizgi kepiline aınalyp otyr.
Bıyl Astana Finance Days-te álemniń 70-ten astam elinen 5 000-nan asa qatysýshy – brokerler, bankırler, ınvestorlar men ınnovatorlardy qosa alǵanda, qarjy jáne tehnologııalyq sektor, sondaı-aq memlekettik jáne kvazımemlekettik sektor ókilderiniń basy qosylady dep josparlanyp otyr.
2025 jylǵy forýmnyń úsh negizgi taqyryptyq baǵyty bar: qarjylyq kapıtal, ınfraqurylymdyq kapıtal jáne ınstıtýtsıonaldyq kapıtal. Bul ártúrli taqyryptardy qamtýǵa múmkindik beredi: spıkerler qarjy, fınteh jáne turaqty damý salasyndaǵy ózekti úrdisterdi, retteý júıesindegi ózgeristerdi jáne jańa qarjylyq ónimder – dástúrli portfeldik ınvestıtsııalardan bastap krıptovalıýtalarǵa deıin talqylaıdy.
Forýmnyń basty spıkerleriniń biri – áıgili fýtýrolog, kásipker ári «Bank 4.0: Jańa qarjylyq qubylys», «Tehnosotsıalızm. Teńsizdik, jasandy ıntellekt pen klımattyń ózgerýi qalaı jańa álemdik kún tártibin qalyptastyrady», «Keńeıtilgen keńistik dáýiri» jáne basqa da álemdik bestsellerlerdiń avtory Brett Kıng bolmaq.
Sonymen qatar spıkerler qatarynda: «RAKÝRS» ekonomıkalyq taldaý ortalyǵynyń dırektory Oraz Jandosov, Freedom Holding Corp. bas atqarýshy dırektory Tımýr Týrlov, Teniz Capital Investment Banking dırektorlar keńesiniń múshesi Ǵalym Hýsaınov, Brookfield kompanııasynyń basqarýshy seriktesi ári Taıaý Shyǵys boıynsha jetekshisi Jad Ellaýn, Goldman Sachs kompanııasynyń seriktesi Rııad ıÝsýf, BNY Mellon halyqaralyq bóliminiń basshysy ári aǵa atqarýshy vıtse-prezıdenti Hanı Kablavı, Janus Henderson Investors kompanııasynyń Taıaý Shyǵys, Afrıka jáne Ortalyq Azııa boıynsha jetekshisi Meshal Djaber Ál-Faras, sondaı-aq jeke bıznes, memlekettik organdar men kvazımemlekettik kompanııalardyń basqa da jetekshileri bar.
Bıylǵy forýmnyń ereksheligi AFD Exhibition Hub – Astana Finance Days biryńǵaı kórme platformasy bolmaq. Ol kapıtal jáne tsıfrlyq ınnovatsııalar naryǵynda jumys isteıtin kompanııalardy biriktiredi jáne oń sheshimderdi kórsetýge, naryqtaǵy pozıtsııany jaqsartýǵa jáne strategııalyq seriktestermen tikeleı baılanys ornatýǵa arnalǵan keńistikti usynady.
Forým uıymdastyrýshysy – «Astana» halyqaralyq qarjy ortalyǵy – Global Financial Centres Index reıtıngine sáıkes Shyǵys Eýropa jáne Ortalyq Azııa óńirindegi №1 qarjy ortalyǵy. Astana Finance Days 2025 altyn seriktester: Freedom Broker jáne KAZ Minerals, kúmis seriktester: Solidcore Resources, ITS jáne MYD Production, qola seriktester: ERG, LMAX Group, Teniz Capital Investment Banking, ónerkásiptik seriktes Allur jáne basqalarynyń qoldaýymen ótedi.
Osy silteme boıynsha Astana Finance Days baǵdarlamasymen tolyǵyraq tanysyp, tirkelýge bolady.