Elordada «Astana» basketbol balalar akademııasy ashyldy
ASTANA. QazAqparat - Elordada Nazarbaev Ýnıversıtetiniń bazasynda «Astana» Prezıdenttik kásipqoı klýbynyń komandasy janynan «Astana» basketbol balalar akademııasy ashyldy, dep habarlaıdy qalalyq ákimdiktiń baspasóz qyzmeti.
Akademııanyń negizgi maqsaty keıingi joǵary sporttyq bilim alýmen elimizde basketboldyń damýy úshin myqty baza qurý bolyp tabylady. Komandanyń jattyqtyrýshylar quramy muqııat irikteldi jáne mańyzdy tarmaqtardyń biri orys tilin bilý boldy.
Shara barysynda tálimgerler úlgili jattyqtyrý ótkizip, sodan keıin balalar «Astana» BK kásipqoı oıynshylarymen oınady.
«Bul bizdiń basketbol úshin qanshalyqty mańyzdy kún ekenin sózben jetkizý qıyn. Búgin biz kýá bolyp otyrǵan osyndaı deńgeıdegi basketbol akademııasynyń ashylýy basketboldyń bolashaqqa jalǵasýy shyǵar. Basketboldy shynymen súıetin balalar úshin bul jerde barlyq jaǵdaı jasalǵan», dep atap kórsetti «Astana» BK bas menedjeri Valerıı Tıhonenko.
«Astana» basketbol balalar akademııasy barlyq halyqaralyq talaptarǵa jaýap beredi: ol biregeı kásibı parketpen (Qazaqstanda analogy joq) jáne qajet qural-jabdyqtarmen jaraqtalǵan, tipti balalardyń kıimderine deıin qarastyrylǵan.
Qazirgi ýaqytta akademııada bekitilgen keste boıynsha 8-14 jas aralyǵyndaǵy 60 bala jattyǵady. Jattyǵýlar tańerteń jáne keshki ýaqytta ótedi.
