Elordada «Astana Balet» teatry ashylady
ASTANA. QazAqparat - 10-11 jeltoqsanda elordada «Astana Balet» teatrynyń saltanatty ashylýy ótedi, onyń qurylysy 2015 jyldyń mamyrynda bastalǵan bolatyn. Nysannyń jalpy aýdany 15 467 m² quraıdy, qurylys jumystaryna 400-ge jýyq qazaqstandyq qurylysshy men maman tartylǵan, dep habarlaıdy Astana ákimdiginiń baspasóz qyzmeti.
«Bul - keremet zamanaýı keshen, munda daıyndyq jasaýǵa, qoıylym kórsetýge arnalǵan úlken zaldar, keń jáne jaryq grımdeý bólmeleri, sport zaly jáne t.b. bar», - deıdi teatr ókilderi.
«Astana Balet» Qazaq ulttyq horeografııa akademııasynyń janynda ornalasqan. Kórermen zalynyń syıymdylyǵy - 783 oryn, sonyń ishinde parter -609 oryn, balkonnyń 2-shi ıarýsy - 104 oryn, balkonnyń 3-shi ıarýsy - 70 oryn. Dızaınerlerdiń usynǵan jobasy boıynsha, altyn-qońyr tústi shymyldyq ilinip, oryndyqtar jaýqazyn tústes materıalmen qaptalǵan, al eden - qońyr tústi.
Sahnanyń aýdany 536 m² quraıdy. Sahnany transformatsııalaý úshin qozǵalmaly jáne kóterý-túsirý mehanıkasynyń eń ozyq tehnologııalary paıdalanyldy. Sahnada eń kúrdeli stsenografııasy bar qoıylymdar qoıýǵa múmkindik bar. Teatrda eki daıyndyq zaly qarastyrylǵan, olardyń aýdany sahnanyń aýdanymen birdeı, bul jańa spektaklderdi qoıǵan kezde óte yńǵaıly.
