Elordada «Astana arlandary» men «Beıjiń aıdaharlary» arasyndaǵy jekpe-jekter ótedi
ASTANA. 6 jeltoqsan. QazAqparat - 11 jeltoqsanda elordadaǵy «Dáýlet» sport kesheninde AІVA-nyń Búkilálemdik boks serııasynyń kezekti jekpe-jekteri ótedi. Onda Qazaqstan namysyn qorǵaıtyn «Astana arlandary» men Qytaıdyń «Beıjiń aıdaharlary» sharshy alańǵa shyǵady.
QR Boks federatsııasynyń habarlaýynsha, el namysyn Qanat Ábýtálipov, Azamat Smaǵulov, Mıras Baıyrhanov, Maksvel Amponso jáne Rýslan Myrsataev qorǵaıdy.
Jarystan bir kún buryn «Dýman» qonaq úıinde bapasóz máslıhaty uıymdastyrylyp, sportshylardyń salmaǵyn ólsheý rásimi ótkiziledi.
Aıta keteıik, Halyqaralyq áýesqoı boks qaýymdastyǵynyń uıymdastyrýymen ótetin dodaǵa 12 memlekettiń komandalary qatysady. Olar óz aımaqtary boıynsha úsh topqa bólingen.
Qazaqstannyń «Astana arlandary» klýby Ońtústik Koreıa, Qytaı jáne Ázirbaıjan komandalarymen bir topta óner kórsetedi.
Buǵan deıin elordadaǵy «Dáýlet» tennıs kesheninde ótken kezdesýde qazaq bylǵary qolǵap sheberleri káristiń «Inchhon qyrandary» dep atalatyn klýbyn 5:0 esebimen oısyrata jeńgen bolatyn. Ókinishke oraı kelesi aınalymda Almatydaǵy «Dostyq» kesheninde Ázirbaıjannyń Baku Fires komandasymen qolǵap túıistirgen qazaqstandyq bokshylar 4:1 esebimen ese jiberdi.
