Elordada Astana aglomeratsııasyn damytý perspektıvalary talqylandy
ASTANA. QazAqparat - Búgin «Astana bas jospary» ǴZJI-de «Astana aglomeratsııasyn aýmaqtyq damytýdyń óńiraralyq syzbasy» jobasy boıynsha qoǵamdyq tyńdaý ótti. Talqylaýǵa Astana qalalyq máslıhatynyń depýtattary, Astana men Aqmola oblysy memlekettik qurylymdyrynyń basshylary qatysty, dep habarlady astana.gov.kz.
Astana aglomeratsııasynyń shekaralary Aqmola oblysynyń úsh aýdany (Arshaly, Tselınograd jáne Shortandy) men Aqkól aýdanynyń tórt okrýginiń 127 eldimekenin qamtıdy.
Astana aglomeratsııasynyń jalpy alańy 1 mıllıonnan artyq adamy bar 2 175 myń gektar jerdi quraıdy. Olardyń 814-i Astanada, 196-sy qala mańyndaǵy mekenderde turady.
Qalaǵa jaqyn ornalasqan eldimekenderdiń iri júıeleriniń Astana aglomeratsııasy eki óńir ortalyǵymen Kókshetaý (aýylsharýashylyq jáne rekreatsııalyq mamandanýmen) jáne Qaraǵandy (ónerkásiptik mamandanýmen) barynsha tyǵyz baılanysty.
Astana aglomeratsııasy básekege qabiletti ekonomıkasy, sapasy joǵary ómir súrý deńgeıi men qorshaǵan ortasy bar, elaralyq jáne óńiraralyq baılanystar júıesine ıntegratsııalanǵan kóp fýnktsııaly aýmaq retinde damıtyn bolady.
Bas josparlardy ázirlegen kezde biz qalanyń shekarasyndaǵy barlyq máseleler oqshaý, jeke-dara sheshilmeıtinin túsinemiz. Sondyqtan biz ózara baılanysta ári birtutas damýy úshin qarqyndy damyp kele jatqan Astana men oǵan irgeles jatqan aýmaqtardy mindetti túrde qarastyramyz. Bizge qalanyń barlyq baǵyttardaǵy qajettilikteri belgili. Olardyń keıbireýlerin biz aglomeratsııa aýmaǵyndaǵy basym máseleler retinde belgiledik. Bul azyq-túlik beldeýi (aýyl sharýashylyǵy, aýylsharýashylyq ónimderin óńdeý, elordany azyq-túlik taǵamdarymen qamtamasyz etý), qurylys ındýstrııasy (Astanany qurylys materıaldarymen qamtamasyz etý), rekreatsııa jáne týrızm (qala turǵyndaryn qysqa merzimdi demalý múmkindikterimen qamtamasyz etý), jasyl beldeý (aglomeratsııa ortalyǵynyń ormandy qorǵaý aýmaǵyn tabıǵı orman massıvterimen qosý jáne biryńǵaı ekojúıeni qamtamasyz etý), dedi «Astana bas jospary» ǴZJI dırektorynyń orynbasary Baqtybaı Taıtalıev.
Aglomeratsııa jobasy 2030 jylǵa deıin ázirlengen.
Jobalyq usynystardy iske asyrý nátıjesinde tikeleı ınvestıtsııalar tartý jáne ındýstrııalyq-ınnovatsııalyq damý úshin jaǵdaı jasalatyn bolady, kólik-kommýnıkatsııalyq, saýda-logıstıkalyq, ınjenerlik-kommýnaldyq jáne áleýmettik ınfraqurylym, aglomeratsııanyń tirek qańqasy (qala qurylysy, kólik jáne ekologııalyq-tabıǵı) qurylady, qaýipsizdikti qamtamasyz etý júıesi jáne tutastaı alǵanda, Astana aglomeratsııasynyń damýy basqarylatyn bolady.
