Elordada «Astana 2012 - túrki áleminiń mádenı astanasy» jyly aıasynda kórme ashyldy
ASTANA. 11 mamyr. QazAqparat - «Astana 2012 - túrki áleminiń mádenı astanasy» jyly aıasynda elordadaǵy QR Ulttyq akademııalyq kitaphanasynda sýretshiler Baqytjan Áripov pen Rýslan Júnisálıevtiń birlesken sýret kórmesi ashyldy.
«Ónerdegi dostyq kókjıegi» dep atalatyn kórmege 70-ten astam kartına qoıyldy. Qylqalam sheberleriniń týyndylary kórkemsýret óneriniń ártúrli baǵyttaryn qamtıdy. B. Áripovtiń sýretteri negizinen grafıka janrynda salynǵan bolsa, R. Júnisálıevtiń óneri keskindemege tym beıim.
Baqytjan qazaq jeriniń týmasy, al Rýslan kórshi qyrǵyz elinen kelgen. Olardyń ónerdegi dostyǵy men baýyrlastyǵy túrki halyqtary arasyndaǵy ejelgi baılanystardyń sımvoly ispettes.
«Galereıada bolyp jatqan búgingi kórme óte erekshe. Eki talantty azamat birlesip, osynaý kórme uıymdastyryp jatyr. Qazaq pen qyrǵyz eki ult qaı kezde de bir-birine baýyrlas. Qos sýretshiniń týyndylaryn kóretin bolsaq, qaı jaǵynda Qazaqstan jaıly, qaı jaǵynda Qyrǵyzstan jaıly shekarasyn bólip aıtý óte qıyn. Halqymyz, saltymyz, dástúrimiz, oıymyz uqsas. Elderimizdiń ekeý-ara dostyǵyn, jaqyndastyǵyn óner arqyly, mádenıet arqyly kórsetip jatyrmyz», - deıdi QR Parlamenti Májilisiniń depýtaty Murat Ábenov.
Qazaqstan Respýblıkasynyń Sýretshiler Odaǵyna múshelik etetin qos talanttyń qylqalamynan shyqqan sýretter Germanııa, Latvııa, Saýd Arabııasy, Frantsııa, Túrkııa, QHR, Izraıl, Qyrǵyzstan jáne Qazaqstan elderinde jeke kollektsııalarda saqtaýly.
