Elordada áskerıler dezınfektsııalaý jumysyn qaıta bastady
NUR-SULTAN. QazAqparat - Qarýly kúshterdiń bıologııalyq qorǵaý bólimsheleriniń áskerıleri Nur-Sultan qalasyndaǵy dezınfektsııa jumystarynyń ekinshi kezeńin bastady, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.
Vırýstyń taralý qaýpi áli de seıile qoımaǵan jaǵdaıda karantın sharalary men sanıtarlyq-epıdemııaǵa qarsy is-sharalardyń saqtalýyn qamtamasyz etý mańyzdy ekeni belgili. Áskerı qyzmetshiler alǵashqy táýlikte adamdar kóp jınalatyn oryndar men qala nysandaryn óńdeıdi. Sonymen qatar, olar Tuńǵysh Prezıdent saıabaǵy men botanıkalyq baqqa vırýsqa qarsy suıyqtyq eritindi shashady.
Sanıtarlyq óńdeý jumystary úshin jeke gazdan qorǵaý jıyntyǵy, dezınfektsııa eritindisi berilip, ARS-14 avtoquıý stansasy jáne jeke quramdy tasymaldaýǵa arnalǵan avtokólik jumyldyryldy.
Buǵan deıin Densaýlyq saqtaý mınıstrligi turǵyndarǵa karantın shekteýin saqtaýǵa shaqyrǵan bolatyn. Sanıtarlyq-epıdemııaǵa qarsy is-sharalardy qamtamasyz etý maqsatynda eldi mekenderde shuǵyl túrde 16 sanıtarlyq óńdeý toby quryldy. Olar bir aptadan beri aımaqtarda qoǵamdyq oryndar men áleýmettik mańyzy bar nysandardy óńdep jatyr.
Tótenshe jaǵdaı rejımi kezinde 29 qalada Qarýly kúshterdiń áskerı qyzmetshileri jalpy aýdany 50 mln sharshy shaqyrymnan asatyn 10,5 myńnan astam áleýmettik mańyzy bar nysandya, uzyndyǵy 4 myń shaqyrym bolatyn jolda dezınfektsııalady.
