Elordada áskerı qyzmetshiler Talǵat Bıgeldınovti eske aldy

NUR-SULTAN. QazAqparat - Eki márte Keńes Odaǵynyń Batyry Talǵat Bıgeldınovtiń týǵanyna 99 jyl tolý qurmetine Nur-Sultan qalasynda dańqty ushqyshtyń eskertkishine gúl shoqtaryn qoıý rásimi ótti. Bul týraly QazAqparat QR Qorǵanys mınıstrliginiń baspasóz qyzmetine silteme jasap habarlaıdy.

Oǵan Halyq Qaharmany armııa generaly Muhtar Altynbaev, Áýe qorǵanysy kúshteriniń bas qolbasshysy avıatsııa general-leıtenanty Nurlan Ormanbetov, Qazaqstan áskerı-áýe kúshteriniń ardagerleri men ofıtserleri qatysty.

– Búgin biz Talǵat Jaqypbekulynyń erligine taǵzym etip, qurmet kórsetý úshin jınalyp otyrmyz. Laıyqty izbasarlardy, táýelsiz Qazaqstannyń áskerı ushqyshtaryn, Otan qorǵaýshylaryn daıarlaıtyn Áýe qorǵanysy kúshteriniń áskerı ınstıtýty batyrdyń esimin maqtanyshpen alyp júr. Bizdiń júregimizde dańqty batyr týraly jarqyn estelikter máńgi saqtalady. Batyrdyń «Oqyńyz. Úırenińiz. Jan-táni saý myqty azamat bolyńyz. Ózińizdi qıyndyqqa tóze bilýge úıretińiz. Kez kelgen jaǵdaıda, kez kelgen qıyndyqta rýhy myqty adam ǵana jeńimpaz bolady. Aǵa býynnyń jaýyngerlik dástúrlerin, eńbekqorlyǵyn ustanatyn adal murageri bolyńyz» degen ósıetin árqashan ustanamyz, – dedi avıatsııa general-leıtenanty Nurlan Ormanbetov.

Talǵat Bıgeldınov Balashovskıı avıatsııalyq ýchılışesiniń kýrsantynan bastap birinshi Ýkraına maıdany quramyndaǵy 144-shi gvardııalyq avıatsııalyq polktiń eskadrılıa komandırine deıingi eńbek jolynan júrip ótti.

Soǵys kezinde ol Il-2 shabýyldaýshy ushaǵynda 305 ret ushyp, batyrlyq, ushýda sheberlik tanytyp, eń jaýapty tapsyrmalardy sátti oryndady. Talǵat Bıgeldınov erligi úshin Lenın, Qyzyl Tý, Aleksandr Nevskıı, Qyzyl Juldyz, III dárejeli Dańq, I jáne II dárejeli Otan soǵysy ordenderimen nagradtaldy, eki ret Keńes Odaǵynyń Batyry ataǵyna ıe boldy.

Soǵystan keıingi jyldary Talǵat Bıgeldınov áskerı jáne azamattyq avıatsııada qyzmet etip, qoǵamdyq jumyspen aınalysty.

Talǵat Jaqypbekuly Bıgeldınov 2014 jylǵy 10 qarashada qaıtys boldy.