Elordada asyq atýdan tuńǵysh álem chempıonaty bastaldy
ASTANA. KAZINFORM — Astanada asyq atý sportynan álem chempıonatynyń ashylý rásimi ótti. Bul týraly elorda ákimdiginiń resmı saıty habarlady.
«Aspan» sport kesheninde ótken is-sharany Kóshpendilerdiń asyq sporty Halyqaralyq federatsııasy men «Asyq atý» respýblıkalyq federatsııasy Astana qalasy ákimdiginiń qoldaýymen uıymdastyryp otyr.
«Qurmetti qatysýshylar men qonaqtar. Búgin asyq atýdan birinshi álem chempıonaty bolyp jatyr. Ol qazaq jerinde ótip jatqany jaıdan-jaı emes. Barlyqtaryńyzǵa qatysqandaryńyzǵa raqmet. Sizderge sáttilik tileı otyryp, búgingi jarysty ashyq dep jarııalaımyn», - dedi Májilis depýtaty, Kóshpendiler Asyq sporty Halyqaralyq federatsııasynyń prezıdenti Oljas Quspekov.
Uıymdastyrýshylardyń aıtýynsha, atalmysh chempıonat qazaq halqynyń ulttyq dástúrleri men mádenıetin álemdik arenada ilgeriletýdegi mańyzdy qadamdardyń biri bolmaq.
«Búgin - tarıhı kún. Sebebi elordada asyq atýdan tuńǵysh álem chempıonaty ótip jatyr. Asyq atý - bul qazaq halqynyń dástúrli oıyny. Oıyn eptilikke, mergendikke, shapshańdyqqa, sergektikke baýlıdy. Bir sózben aıtqanda, bul oıynnyń paıdasy mol», - dedi Asyq atý federatsııasynyń atqarýshy dırektory Azamat Manapov.
Búgin ashylý rásiminde qatysýshylar men kórermenderge áserli kontserttik baǵdarlamalar, ulttyq mýzykalyq jáne bı qoıylymdary uıymdastyryldy. Sondaı-aq jınalǵandar asyq atý oıyny týraly jan-jaqty aqparat alyp, onyń qyr-syrymen tanysty.
Ulttyq sporttyq is-sharanyń maqsaty – asyq atýdy álemdik deńgeıde nasıhattaý, halyqaralyq sporttyq baılanystardy nyǵaıtý.
Elordada Asyq atýdan Álem boıynsha chempıonatqa 15 elden eń úzdik sportshylar qatysyp, qazaqtyń ulttyq oıyny asyq atýda baq synap jatyr.
Jeńimpazdar aqshalaı syıaqymen jáne kýboktarmen marapattalady.
Sporttyq jarysqa Qazaqstan, AQSh, Grýzııa, Vengrııa, Reseı Federatsııasy, Rýmynııa, Mońǵolııa, Tájikstan, Túrkııa, Ispanııa, Chehııa, Úndistan, Ózbekstan sekildi eldiń sportshylary keldi.
