Elordada ashylǵan jańa meshit týraly ne bilemiz

ASTANA. QazAqparat – Elorda tórinde taǵy bir meshit boı kóterdi. Jańa meshitke 500 adam erkin syıyp, qulshylyq ete alady. QazAqparat tilshisi Astananyń sol jaǵalaýyndaǵy jańa meshitke baryp qaıtty, oqyrman nazaryna fotoreportaj usynamyz.

«Elordamyz taǵy bir meshitpen tolyqty. Jańa meshitke Allanyń 99 esiminiń biri Ál-Fattah ataýyn berdik. Ol «jeńimpaz» degendi bildiredi. Allanyń jańa úıi turǵyndardyń ıman tárbıesine úlken úlesin qosady dep senemin. Árıne, meshit tek qana qulshylyq etý emes, bul rýhanı, mádenı oryn. Meshit - meıirim mekeni. Turǵyndary ımandy elde tynyshtyq, bereke jáne birlik bolady», - degen edi Qazaqstan musylmandary dinı basqarmasynyń tóraǵasy Naýryzbaı qajy Taǵanuly jańa meshittiń ashylý saltanatynda.

Sondaı-aq, bas múftı elorda jurtyn jańa meshittiń ashylýymen quttyqtaı otyryp, el ıgiligine jaraýyn tiledi.

Nárikbaev (5/1) kóshesinde ornalasqan meshitte bir ýaqytta 500 adamnyń ǵıbadat etý múmkindigi bar.

Onyń jalpy alańy - 713 sharshy metr.Ál-Fattah meshitinde namaz zalynan bólek, dárishana, ımamdar bólmesi, quran oqý jáne neke qııý bólmesi bar.

Odan bólek, erler men áıelder bólek dárethanamen qamtylǵan.

«Azan shaqyrylyp, tańerteń uıqymyzdan oıatatyn meshitterdiń qatary kóbeıip jatqanyna óte qýanyshtymyn. Óskeleń urpaq ımandy bolyp, Allanyń týra jolymen ósse, biz baqyttymyz. Ózim osy mańaıda turamyn, jańa meshit ashylyp jatyr degendi estigende úıde otyra almadym. Elimiz aman, jurtymyz tynysh bolsyn», - deıdi meshitke kelgen elordalyq ájeı.

Bas múftıdiń buıryǵymen jańa meshittiń bas ımamy bolyp Baǵdat Abdýlkarımov taǵaıyndaldy.

«Bul meshittiń bir ereksheligi - erler men áıelderdiń kirip-shyǵýy men qulshylyq etýi úshin arnaıy jaǵdaı jasalǵan. Áıelder bólek jerden kirip shyǵady. Árıne, ájethanasy da bólek. Meshit shamamen 30 sotyq jerdi alyp jatyr. Aýlada kólikterge arnalǵan avtoturaqtar qarastyrylǵan. Jalpy jańa meshit óz ornyn tapty deýge bolady. Jamaǵat ashyla sala kóptep jınalyp jatyr. Meshit qyzmetkerleriniń shtaty jasaqtalý ústinde, buıryq áli shyqqan joq. Degenmen qazir bir naıb ımam men ustaz jumysqa kiristi», - deıdi bas ımam.

Aıta ketsek, jańa meshittiń ashylý saltanatynda memleket jáne qoǵam qaıratkerleri, aqsaqaldar sóz sóılep, bata berdi.

Eske salaıyq, búginde Astanada 15 meshit bar.