Elordada ashyq aspan astyndaǵy áskerı tehnıka mýzeıi qurylady

NUR-SULTAN. QazAqparat - Nur-Sultan qalasynda 7 mamyr - Otan qorǵaýshy kúni qarsańynda ashyq aspan astyndaǵy áskerı tehnıka mýzeıi ashylady. Bul týraly QR Qorǵanys mınıstrliginiń baspasóz qyzmetinen málim etti, dep habarlaıdy QazAqparat.

«Qorǵanys mınıstriniń tapsyrmasymen Otan qorǵaýshy kúnin jáne Ekinshi dúnıejúzilik soǵystaǵy Jeńistiń 74 jyldyǵyn atap ótýge daıyndyq aıasynda Ulttyq áskerı-patrıottyq ortalyq aýmaǵynda ashyq aspan astyndaǵy áskerı tehnıka mýzeıi ashylady. Ortalyqtyń alańyna artıllerııalyq qondyrǵylar, avıatsııa, bronetankilik tehnıkalar sekildi áskerı tehnıkalar men qarý-jaraqtyń zamanaýı úlgileri, sondaı-aq Ekinshi dúnıejúzilik soǵys pen soǵystan keıingi jyldardaǵy áskerı tehnıkalardyń úlgileri qoıylady. Ashyq aspan astyndaǵy áskerı tehnıka mýzeıi astanalyqtar men qala qonaqtaryna otandyq qarý-jaraq tarıhymen tanysý, áskerı tehnıkalardy óz kózimen kórip, qolymen ustaýǵa da múmkindik beredi», - delingen aqparatta.

Sondaı-aq mýzeı qazirgi jastardy qazaqstandyq patrıotızmge baýlyp, olardyń Otanǵa, týǵan-týystaryna, soǵys ardagerlerine, jalpy áskerı qaqtyǵystardyń qatysýshylaryna degen zor qurmet sezimin bekite túspek.